[940] So tehi phuṭṭho bahudhā anokoti so tehīti ātaṅkaphassena ca khudāya ca sītena ca uṇhena ca phuṭṭho pareto samohito samannāgato assāti so tehi phuṭṭho . bahudhāti anekavidhehi ākārehi phuṭṭho pareto samohito samannāgato assāti so tehi phuṭṭho bahudhā . anokoti abhisaṅkhārasahagataviññāṇassa okāsaṃ na karotītipi anoko . athavā kāyaduccaritassa vacīduccaritassa manoduccaritassa okāsaṃ na karotītipi anokoti so tehi phuṭṭho bahudhā anoko.

[941] Viriyaparakkamaṃ daḷhaṃ kareyyāti viriyaparakkamo vuccati yo cetasiko viriyārambho nikkamo parakkamo uyyāmo vāyāmo ussāho ussoḷhī appaṭivānī thāmo dhiti asithilaparakkamatā anikkhittacchandatā anikkhittadhuratā dhurasampaggāho viriyaṃ viriyindriyaṃ viriyabalaṃ sammāvāyāmo . viriyaparakkamaṃ daḷhaṃ kareyya [3]- daḷhasamādāno assa avaṭṭhitasamādānoti viriyaparakkamaṃ daḷhaṃ kareyya. Tenāha bhagavā Ātaṅkaphassena khudāya phuṭṭho sītaṃ athuṇhaṃ adhivāsayeyya so tehi phuṭṭho bahudhā anoko viriyaparakkamaṃ daḷhaṃ kareyyāti.

[942] Theyyaṃ na kareyya na musā bhaṇeyya mettāya phasse tasathāvarāni yadāvilattaṃ manaso vijaññā kaṇhassa pakkhoti vinodayeyya.

[943] Theyyaṃ na kareyya na musā bhaṇeyyāti theyyaṃ na kareyyāti idha bhikkhu adinnaṃ pahāya adinnādānā paṭivirato assa dinnādāyī dinnapāṭikaṅkhī athenena sucibhūtena attanā vihareyyāti theyyaṃ na kareyya . na musā bhaṇeyyāti idha bhikkhu musāvādaṃ pahāya musāvādā paṭivirato assa saccavādī saccasandho theto paccayiko avisaṃvādako lokassāti theyyaṃ na kareyya na musā bhaṇeyya.