[944] Mettāya phasse tasathāvarānīti mettāti yā sattesu metti mettāyanā mettāyitattaṃ anudā anudāyanā anudāyitattaṃ hitesitā anukampā abyāpādo abyāpajjho adoso kusalamūlaṃ . Tasāti yesaṃ tasiṇā taṇhā appahīnā yesañca bhayabheravā appahīnā . kiṃkāraṇā vuccanti tasā . te tasanti uttasanti Parittasanti bhāyanti santāsaṃ āpajjanti taṃkāraṇā vuccanti tasā . thāvarāti yesaṃ tasiṇā taṇhā pahīnā yesañca bhayabheravā pahīnā . kiṃkāraṇā vuccanti thāvarā . te na tasanti na uttasanti na parittasanti na bhāyanti na santāsaṃ āpajjanti taṃkāraṇā vuccanti thāvarā . mettāya phasse tasathāvarānīti tase ca thāvare ca mettāya phasseyya phareyya mettāsahagatena cetasā vipulena mahaggatena appamāṇena averena abyāpajjhena pharitvā vihareyyāti mettāya phasse tasathāvarāni.
[945] Yadāvilattaṃ manaso vijaññāti yadāti yadā . manasoti yaṃ cittaṃ mano mānasaṃ hadayaṃ paṇḍaraṃ mano manāyatanaṃ manindriyaṃ viññāṇaṃ viññāṇakkhandho tajjā manoviññāṇadhātu . kāyaduccaritena cittaṃ āvilaṃ hoti luḷitaṃ eritaṃ ghaṭṭitaṃ calitaṃ bhantaṃ avūpasantaṃ vacīduccaritena manoduccaritena rāgena dosena mohena kodhena upanāhena makkhena paḷāsena issāya macchariyena māyāya sāṭheyyena thambhena sārambhena mānena atimānena madena pamādena sabbakilesehi sabbaduccaritehi sabbadarathehi sabbapariḷāhehi sabbasantāpehi sabbākusalābhisaṅkhārehi cittaṃ āvilaṃ hoti luḷitaṃ eritaṃ ghaṭṭitaṃ calitaṃ bhantaṃ avūpasantaṃ . yadāvilattaṃ manaso vijaññāti cittassa āvilabhāvaṃ jāneyya ājāneyya vijāneyya paṭivijāneyya paṭivijjheyyāti yadāvilattaṃ manaso vijaññā.
[946] Kaṇhassa pakkhoti vinodayeyyāti kaṇhoti yo so māro kaṇho adhipati antagū namuci pamattabandhu . kaṇhassa pakkhoti vinodayeyyāti kaṇhapakkho mārapakkho mārapāso mārabaḷisaṃ mārāmisaṃ māravisayo mārantatapo māragocaro mārabandhananti pajaheyya vinodeyya bayantīkareyya anabhāvaṅgameyyāti evampi kaṇhassa pakkhoti vinodayeyya . athavā kaṇhapakkho mārapakkho akusalapakkho dukkhudayo dukkhavipāko nirayasaṃvattaniko tiracchānayonisaṃvattaniko pittivisayasaṃvattanikoti pajaheyya vinodeyya byantīkareyya anabhāvaṅgameyyāti evampi kaṇhassa pakkhoti vinodayeyya. Tenāha bhagavā theyyaṃ na kareyya na musā bhaṇeyya mettāya phasse tasathāvarāni yadāvilattaṃ manaso vijaññā kaṇhassa pakkhoti vinodayeyyāti.