[951] Paññaṃ purakkhatvā kalyāṇapīti vikkhambhaye tāni parissayāni aratiṃ sahetha sayanamhi pante caturo sahetha paridevadhamme.

[952] Paññaṃ purakkhatvā kalyāṇapītīti paññāti yā paññā pajānanā vicayo pavicayo dhammavicayo .pe. amoho dhammavicayo sammādiṭṭhi . paññaṃ purakkhatvāti idhekacco paññaṃ purato katvā carati paññādhajo paññāketu paññādhipateyyo vicayabahulo pavicayabahulo okkhāyanabahulo samokkhāyanabahulo vibhūtavihārī taccariko tabbahulo taggaruko tanninno tappoṇo tappabbhāro tadadhimutto tadādhipateyyoti evampi paññaṃ purakkhatvā . athavā gacchanto vā gacchāmīti pajānāti ṭhito vā ṭhitomhīti pajānāti nisinno vā nisinnomhīti pajānāti sayāno vā sayānomhīti pajānāti yathā yathā vā panassa kāyo paṇihito hoti tathā tathā naṃ pajānātīti evampi paññaṃ purakkhatvā. {952.1} Athavā abhikkante paṭikkante sampajānakārī hoti ālokite vilokite sampajānakārī hoti sammiñjite pasārite sampajānakārī hoti saṅghāṭipattacīvaradhāraṇe sampajānakārī hoti asite pīte khāyite sāyite sampajānakārī hoti uccārapassāvakamme sampajānakārī hoti gate ṭhite nisinne sutte jāgarite bhāsite tuṇhībhāve Sampajānakārī hotīti evampi paññaṃ purakkhatvā . kalyāṇapītīti buddhānussativasena uppajjati pīti pāmujjaṃ kalyāṇapīti dhammānussativasena saṅghānussativasena sīlānussativasena cāgānussativasena devatānussativasena ānāpānassativasena maraṇānussativasena kāyagatāsativasena upasamānussativasena uppajjati pīti pāmujjaṃ kalyāṇapītīti paññaṃ purakkhatvā kalyāṇapīti.

[953] Vikkhambhaye tāni parissayānīti parissayāti dve parissayā pākaṭaparissayā ca paṭicchannaparissayā ca .pe. ime vuccanti pākaṭaparissayā .pe. ime vuccanti paṭicchannaparissayā .pe. Evampi tatrāsayāti parissayā . vikkhambhaye tāni parissayānīti tāni parissayāni vikkhambheyya abhibhaveyya ajjhotthareyya pariyādiyeyya maddeyyāti vikkhambhaye tāni parissayāni.