[978] Janavādadhammāya na cetayeyyāti janāti khattiyā ca brāhmaṇā ca vessā ca suddā ca gahaṭṭhā ca pabbajitā ca devā ca manussā ca . janassa vādāya upavādāya nindāya garahāya akittiyā avaṇṇahārikāya sīlavipattiyā vā ācāravipattiyā vā diṭṭhivipattiyā vā ājīvavipattiyā vā na cetayeyya cetanaṃ na uppādeyya cittasaṅkappaṃ na uppādeyya manasikāraṃ na uppādeyyāti janavādadhammāya na cetayeyya. Tenāha bhagavā cudito vacībhi satimābhinande sabrahmacārīsu khilaṃ pabhinde vācaṃ pamuñce kusalaṃ nātivelaṃ janavādadhammāya na cetayeyyāti.

[979] Athāparaṃ pañca rajāni loke yesaṃ satīmā vinayāya sikkhe rūpesu saddesu atho rasesu gandhesu phassesu sahetha rāgaṃ.

[980] Athāparaṃ pañca rajāni loketi athāti padasandhi padasaṃsaggo padapāripūri akkharasamavāyo byañjanasiliṭṭhatā padānupubbatāmetaṃ athāti . pañca rajānīti rūparāgo saddarāgo gandharāgo rasarāgo phoṭṭhabbarāgo. Athavā Rāgo rajo na ca pana reṇū vuccati rāgassetaṃ adhivacanaṃ rajoti etaṃ rajaṃ vippajahitva paṇḍitā viharanti te vigatarajassa sāsane. Doso rajo na ca pana reṇū vuccati dosassetaṃ adhivacanaṃ rajoti etaṃ rajaṃ vippajahitva paṇḍitā viharanti te vigatarajassa sāsane. Moho rajo na ca pana reṇū vuccati mohassetaṃ adhivacanaṃ rajoti etaṃ rajaṃ vippajahitva paṇḍitā viharanti te vigatarajassa sāsane. Loketi apāyaloke manussaloke devaloke khandhaloke dhātuloke āyatanaloketi athāparaṃ pañca rajāni loke.

[981] Yesaṃ satīmā vinayāya sikkheti yesanti rūparāgassa saddarāgassa gandharāgassa rasarāgassa phoṭṭhabbarāgassa . satīmāti yā sati anussati paṭissati sati saraṇatā dhāraṇatā apilāpanatā assammussanatā sati satindriyaṃ satibalaṃ sammāsati satisambojjhaṅgo ekāyanamaggo ayaṃ vuccati sati . imāya satiyā upeto samupeto upagato samupagato upapanno samupapanno samannāgato so vuccati Satimā . sikkheti tisso sikkhā adhisīlasikkhā adhicittasikkhā adhipaññāsikkhā . katamā adhisīlasikkhā .pe. ayaṃ adhipaññāsikkhā . Yesaṃ satīmā vinayāya sikkheti satimā puggalo yesaṃ rūparāgassa saddarāgassa gandharāgassa rasarāgassa phoṭṭhabbarāgassa vinayāya paṭivinayāya pahānāya vūpasamāya paṭinissaggāya paṭippassaddhiyā adhisīlampi sikkheyya adhicittampi sikkheyya adhipaññampi sikkheyya imā tisso sikkhā āvajjento sikkheyya jānanto sikkheyya .pe. sacchikātabbaṃ sacchikaronto sikkheyya ācareyya samācareyya samādāya vatteyyāti yesaṃ satīmā vinayāya sikkhe.