[117] Aññena so sujjhati sopadhīkoti aññena asuddhimaggena micchāpaṭipadāya aniyyānapathena aññatra satipaṭṭhānehi aññatra sammappadhānehi aññatra iddhippādehi aññatra indriyehi aññatra balehi aññatra bojjhaṅgehi aññatra ariyā aṭṭhaṅgikā maggā naro sujjhati visujjhati parisujjhati muccati vimuccati parimuccati . sopadhīkoti sarāgo sadoso samoho samāno sataṇho sadiṭṭhi sakileso saupādānoti aññena so sujjhati sopadhīko.

[118] Diṭṭhī hi naṃ pāva tathā vadānanti sāva diṭṭhi taṃ puggalaṃ pāvadati itipāyaṃ puggalo micchādiṭṭhiko viparītadassanoti . tathā vadānanti tathā vadantaṃ kathentaṃ bhaṇantaṃ dīpayantaṃ voharantaṃ sassato loko idameva saccaṃ moghamaññanti tathā vadantaṃ kathentaṃ bhaṇantaṃ dīpayantaṃ voharantaṃ asassato loko antavā loko anantavā loko taṃ jīvaṃ taṃ sarīraṃ aññaṃ jīvaṃ aññaṃ sarīraṃ hoti tathāgato parammaraṇā na hoti tathāgato parammaraṇā hoti ca na ca hoti tathāgato parammaraṇā neva hoti na na hoti tathāgato parammaraṇā idameva saccaṃ moghamaññanti tathā vadantaṃ kathentaṃ bhaṇantaṃ dīpayantaṃ voharantanti diṭṭhī hi naṃ pāva tathā Vadānaṃ. Tenāha bhagavā diṭṭhena ce suddhi narassa hoti ñāṇena vā so pajahāti dukkhaṃ aññena so sujjhati sopadhīko diṭṭhī hi naṃ pāva tathā vadānanti.

[119] Na brāhmaṇo aññato suddhimāha diṭṭhe sute sīlavate mute vā puññe ca pāpe ca anūpalitto attañjaho nayidha pakubbamāno.

[120] Na brāhmaṇo aññato suddhimāha diṭṭhe sute sīlavate mute vāti nāti paṭikkhepo . brāhmaṇoti sattannaṃ dhammānaṃ bāhitattā brāhmaṇo . sakkāyadiṭṭhi bāhitā hoti vicikicchā bāhitā hoti sīlabbataparāmāso bāhito hoti rāgo bāhito hoti doso bāhito hoti moho bāhito hoti māno bāhito hoti . bāhitassa honti pāpakā akusalā dhammā saṅkilesikā ponobbhavikā sadarā dukkhavipākā āyatiṃ jātijarāmaraṇīyā. Bāhetvā sabbapāpakāni (sabhiyāti bhagavā) vimalo sādhusamāhito ṭhitatto saṃsāramaticca kevalī so anissito tādi pavuccate sa brahmā. {120.1} Na brāhmaṇo aññato suddhimāhāti brāhmaṇo aññena asuddhimaggena micchāpaṭipadāya aniyyānapathena aññatra satipaṭṭhānehi aññatra sammappadhānehi aññatra iddhippādehi aññatra indriyehi aññatra balehi aññatra bojjhaṅgehi aññatra ariyā aṭṭhaṅgikā maggā suddhiṃ visuddhiṃ parisuddhiṃ muttiṃ vimuttiṃ parimuttiṃ nāha na katheti na bhaṇati na dīpayati na voharatīti na brāhmaṇo aññato suddhimāha . diṭṭhe sute sīlavate mute vāti santeke samaṇabrāhmaṇā diṭṭhasuddhikā te ekaccānaṃ rūpānaṃ dassanaṃ maṅgalaṃ paccenti ekaccānaṃ rūpānaṃ dassanaṃ amaṅgalaṃ paccenti. {120.2} Katamesaṃ rūpānaṃ dassanaṃ maṅgalaṃ paccenti. Te kālato vuṭṭhahitvā abhimaṅgalagatāni rūpāni passanti vātasakuṇaṃ passanti pussaveḷuvalaṭṭhiṃ passanti gabbhinitthiṃ passanti kumārikaṃ khandhe āropetvā gacchantaṃ passanti puṇṇaghaṭaṃ passanti rohitamacchaṃ passanti ājaññaṃ passanti ājaññarathaṃ passanti usabhaṃ passanti gokapilaṃ passanti evarūpānaṃ rūpānaṃ dassanaṃ maṅgalaṃ paccenti. {120.3} Katamesaṃ rūpānaṃ dassanaṃ amaṅgalaṃ paccenti. Palālapuñjaṃ passanti takkaghaṭaṃ passanti rittaghaṭaṃ passanti naṭaṃ passanti naggasamaṇaṃ passanti kharaṃ passanti kharayānaṃ passanti ekayuttayānaṃ Passanti kāṇaṃ passanti kuṇiṃ passanti khañjaṃ passanti pakkhahataṃ passanti jiṇṇakaṃ passanti byādhikaṃ passanti mataṃ passanti evarūpānaṃ rūpānaṃ dassanaṃ amaṅgalaṃ paccenti . ime te samaṇabrāhmaṇā diṭṭhasuddhikā te diṭṭhena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti. {120.4} Santeke samaṇabrāhmaṇā sutasuddhikā te ekaccānaṃ saddānaṃ savanaṃ maṅgalaṃ paccenti ekaccānaṃ saddānaṃ savanaṃ amaṅgalaṃ paccenti. {120.5} Katamesaṃ saddānaṃ savanaṃ maṅgalaṃ paccenti . te kālato vuṭṭhahitvā abhimaṅgalagatāni saddāni suṇanti vaḍḍhāti vā vaḍḍhamānāti vā puṇṇāti vā pussāti vā assokāti vā sumanāti vā sunakkhattāti vā sumaṅgalāti vā sirīti vā sirīvaḍḍhāti vā evarūpānaṃ saddānaṃ savanaṃ maṅgalaṃ paccenti. {120.6} Katamesaṃ saddānaṃ savanaṃ amaṅgalaṃ paccenti. Kāṇoti vā kuṇīti vā khañjoti vā pakkhahatoti vā jiṇṇakoti vā byādhikoti vā matoti vā chinnanti vā bhinnanti vā daḍḍhanti vā naṭṭhanti vā natthīti vā evarūpānaṃ saddānaṃ savanaṃ amaṅgalaṃ paccenti . ime te samaṇabrāhmaṇā sutasuddhikā te sutena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti. {120.7} Santeke samaṇabrāhmaṇā sīlasuddhikā te sīlamattena saññamamattena saṃvaramattena avītikkamamattena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti . samaṇamuṇḍikāputto evamāha catūhi kho ahaṃ thapati dhammehi samannāgataṃ purisapuggalaṃ paññāpemi sampannakusalaṃ paramakusalaṃ uttamappattippattaṃ samaṇaṃ ayojjhaṃ katamehi catūhi idha thapati na kāyena pāpakammaṃ karoti na pāpikaṃ vācaṃ bhāsati na pāpakaṃ saṅkappaṃ saṅkappeti na pāpakaṃ ājīvaṃ ājīvati imehi kho ahaṃ thapati catūhi dhammehi samannāgataṃ purisapuggalaṃ paññāpemi sampannakusalaṃ paramakusalaṃ uttamappattippattaṃ samaṇaṃ ayojjhaṃ . evameva santeke samaṇabrāhmaṇā sīlasuddhikā te sīlamattena saññamamattena saṃvaramattena avītikkamamattena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti. {120.8} Santeke samaṇabrāhmaṇā vattasuddhikā te hatthivattikā vā honti assavattikā vā honti govattikā vā honti kukkuravattikā vā honti kākavattikā vā honti vāsudevavattikā vā honti baladevavattikā vā honti puṇṇabhaddavattikā vā honti maṇibhaddavattikā vā honti aggivattikā vā honti nāgavattikā vā honti supaṇṇavattikā vā honti yakkhavattikā vā honti asuravattikā vā honti gandhabbavattikā vā honti mahārājavattikā vā honti candavattikā vā honti suriyavattikā Vā honti indavattikā vā honti brahmavattikā vā honti devavattikā vā honti disavattikā vā honti . ime te samaṇabrāhmaṇā vattasuddhikā te vattena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti. {120.9} Santeke samaṇabrāhmaṇā mutasuddhikā . te kālato vuṭṭhahitvā paṭhaviṃ āmasanti haritaṃ āmasanti gomayaṃ āmasanti kacchapaṃ āmasanti jālaṃ akkamanti tilavāhaṃ āmasanti pussatilaṃ khādanti pussatelaṃ makkhenti pussadantakaṭṭhaṃ khādanti pussamattikāya nahāyanti pussasāṭakaṃ nivāsenti pussaveṭṭhanaṃ veṭṭhanti . ime te samaṇabrāhmaṇā mutasuddhikā te mutena suddhiṃ visuddhiṃ parisuddhiṃ muttiṃ vimuttiṃ parimuttiṃ paccenti. {120.10} Na brāhmaṇo aññato suddhimāha diṭṭhe sute sīlavate mute vāti brāhmaṇo diṭṭhasuddhiyāpi suddhiṃ nāha sutasuddhiyāpi suddhiṃ nāha sīlasuddhiyāpi suddhiṃ nāha vattasuddhiyāpi suddhiṃ nāha mutasuddhiyāpi suddhiṃ nāha na katheti na bhaṇati na dīpayati na voharatīti na brāhmaṇo aññato suddhimāha diṭṭhe sute sīlavate mute vā.