[121] Puññe ca pāpe ca anūpalittoti puññaṃ vuccati yaṅkiñci tedhātukaṃ kusalābhisaṅkhāraṃ . apuññaṃ vuccati sabbaṃ akusalaṃ . yato puññābhisaṅkhāro ca apuññābhisaṅkhāro ca Āneñjābhisaṅkhāro ca pahīnā honti ucchinnamūlā tālāvatthukatā anabhāvaṅgatā āyatiṃ anuppādadhammā ettāvatā ca puññe ca pāpe ca na limpati na saṃlimpati na upalimpati alitto asaṃlitto anūpalitto nikkhanto nissaṭṭho vippamutto visaññutto vimariyādikatena cetasā viharatīti puññe ca pāpe ca anūpalitto.

[122] Attañjaho nayidha pakubbamānoti attañjahoti attadiṭṭhijaho . attañjahoti gāhajaho . attañjahoti taṇhāvasena diṭṭhivasena gahitaṃ parāmaṭṭhaṃ abhiniviṭṭhaṃ ajjhositaṃ adhimuttaṃ sabbaṃ taṃ cattaṃ hoti vantaṃ muttaṃ pahīnaṃ paṭinissaṭṭhaṃ . Nayidha pakubbamānoti puññābhisaṅkhāraṃ vā apuññābhisaṅkhāraṃ vā āneñjābhisaṅkhāraṃ vā akubbamāno ajanayamāno asañjanayamāno anibbattayamāno anabhinibbattayamānoti attañjaho nayidha pakubbamāno. Tenāha bhagavā na brāhmaṇo aññato suddhimāha diṭṭhe sute sīlavate mute vā puññe ca pāpe ca anūpalitto attañjaho nayidha pakubbamānoti.

[123] Purimaṃ pahāya aparaṃ sitāse ejānugā te na taranti saṅgaṃ Te uggahāyanti nirassajanti kapīva sākhaṃ pamukhaṃ gahāya.

[124] Purimaṃ pahāya aparaṃ sitāseti purimaṃ satthāraṃ pahāya aparaṃ satthāraṃ nissitā purimaṃ dhammakkhānaṃ pahāya aparaṃ dhammakkhānaṃ nissitā purimaṃ gaṇaṃ pahāya aparaṃ gaṇaṃ nissitā purimaṃ diṭṭhiṃ pahāya aparaṃ diṭṭhiṃ nissitā purimaṃ paṭipadaṃ pahāya aparaṃ paṭipadaṃ nissitā purimaṃ maggaṃ pahāya aparaṃ maggaṃ nissitā sannissitā allīnā upagatā ajjhositā adhimuttāti purimaṃ pahāya aparaṃ sitāse.