[161] Samoti attānamanūpaneyyāti sadisohamasmīti attānaṃ na upaneyya jātiyā vā gottena vā kolaputtikena vā vaṇṇapokkharatāya vā dhanena vā ajjhenena vā kammāyatanena vā sippāyatanena vā vijjaṭṭhānena vā sutena vā paṭibhāṇena vā aññataraññatarena vā vatthunāti samoti attānamanūpaneyya.

[162] Hīno na maññetha visesi vāpīti hīnohamasmīti attānaṃ na upaneyya jātiyā vā gottena vā .pe. aññataraññatarena vā vatthunā seyyohamasmīti attānaṃ na upaneyya jātiyā vā gottena vā .pe. aññataraññatarena vā vatthunāti hīno na Maññetha visesi vāpi. Tenāha bhagavā diṭṭhiṃpi lokasmi na kappayeyya ñāṇena vā sīlavatena vāpi samoti attānamanūpaneyya hīno na maññetha visesi vāpīti.

[163] Attaṃ pahāya anupādiyāno ñāṇepi so nissaya no karoti sa ve viyattesu na vaggasārī diṭṭhiṃpi so na pacceti kiñci.

[164] Attaṃ pahāya anupādiyānoti attaṃ pahāyāti attadiṭṭhiṃ pahāya . attaṃ pahāyāti gāhaṃ pahāya. Attaṃ pahāyāti taṇhāvasena diṭṭhivasena gahitaṃ parāmaṭṭhaṃ abhiniviṭṭhaṃ ajjhositaṃ adhimuttaṃ pahāya pajahitvā vinodetvā byantīkatvā anabhāvaṅgamitvā . Attaṃ pahāya anupādiyānoti catūhi upādānehi anupādiyamāno aggaṇhamāno aparāmasamāno anabhinivisamānoti attaṃ pahāya anupādiyāno.