[165] Ñāṇepi so nissaya no karotīti aṭṭhasamāpattiñāṇe vā pañcābhiññāñāṇe vā micchāñāṇe vā taṇhānissayaṃ vā diṭṭhinissayaṃ vā na karoti na janeti na sañjaneti na nibbatteti nābhinibbattetīti ñāṇepi so nissaya no karoti.

[166] Sa ve viyattesu na vaggasārīti sa ve vavatthitesu bhinnesu dvejjhāpannesu dveḷhakajātesu nānādiṭṭhikesu nānākhantikesu nānārucikesu nānāladdhikesu nānādiṭṭhinissayanissitesu chandāgatiṃ gacchantesu dosāgatiṃ gacchantesu mohāgatiṃ gacchantesu bhayāgatiṃ gacchantesu na chandāgatiṃ gacchati na dosāgatiṃ gacchati na mohāgatiṃ gacchati na bhayāgatiṃ gacchati na rāgavasena gacchati na dosavasena gacchati na mohavasena gacchati na mānavasena gacchati na diṭṭhivasena gacchati na uddhaccavasena gacchati na vicikicchāvasena gacchati na anusayavasena gacchati na vaggehi dhammehi yāyati niyyāyati vuyhati saṃhariyatīti sa ve viyattesu na vaggasārī.

[167] Diṭṭhiṃpi so na pacceti kiñcīti tassa dvāsaṭṭhīdiṭṭhigatāni pahīnāni samucchinnāni vūpasantāni paṭippassaddhāni abhabbuppattikāni ñāṇagginā daḍḍhāni so kiñci diṭṭhigataṃ na pacceti na paccāgacchatīti diṭṭhiṃpi so na pacceti kiñci. Tenāha bhagavā attaṃ pahāya anupādiyāno ñāṇepi so nissaya no karoti sa ve viyattesu na vaggasārī diṭṭhiṃpi so na pacceti kiñcīti.

[168] Yassūbhayante paṇidhīdha natthi bhavābhavāya idha vā huraṃ vā Nivesanā tassa na santi keci dhammesu niccheyya samuggahītaṃ.