[169] Yassūbhayante paṇidhīdha natthi bhavābhavāya idha vā huraṃ vāti yassāti arahato khīṇāsavassa . antāti phasso eko anto phassasamudayo dutiyo anto . atītaṃ eko anto anāgataṃ dutiyo anto . sukhā vedanā eko anto dukkhā vedanā dutiyo anto . nāmaṃ eko anto rūpaṃ dutiyo anto . cha ajjhattikāni āyatanāni eko anto cha bāhirāni āyatanāni dutiyo anto . Sakkāyo eko anto sakkāyasamudayo dutiyo anto . paṇidhi vuccati taṇhā yo rāgo sārāgo .pe. abhijjhā lobho akusalamūlaṃ. Bhavābhavāyāti bhavābhavāya kammabhavāya punabbhavāya kāmabhavāya kammabhavāya kāmabhavāya punabbhavāya rūpabhavāya kammabhavāya rūpabhavāya punabbhavāya arūpabhavāya kammabhavāya arūpabhavāya punabbhavāya punappunaṃ bhavāya punappunaṃ gatiyā punappunaṃ upapattiyā punappunaṃ paṭisandhiyā punappunaṃ attabhāvābhinibbattiyā . idhāti sakattabhāvo . Hurāti parattabhāvo . idhāti sakarūpavedanāsaññāsaṅkhāraviññāṇaṃ . Hurāti pararūpavedanāsaññā saṅkhāra viññāṇaṃ . idhāti cha ajjhattikāni āyatanāni . hurāti cha bāhirāni āyatanāni . idhāti manussaloko. Hurāti devaloko . Idhāti kāmadhātu. Hurāti rūpadhātu arūpadhātu. Idhāti Kāmadhātu rūpadhātu. Hurāti arūpadhātu. {169.1} Yassūbhayante paṇidhīdha natthi bhavābhavāya idha vā huraṃ vāti yassa ubho ante bhavābhavāya idha vā huraṃ vā paṇidhi natthi na saṃvijjati nupalabbhati pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti yassūbhayante paṇidhīdha natthi bhavābhavāya idha vā huraṃ vā.

[170] Nivesanā tassa na santi kecīti nivesanāti dve nivesanā taṇhānivesanā ca diṭṭhinivesanā ca .pe. ayaṃ taṇhānivesanā .pe. ayaṃ diṭṭhinivesanā . tassāti arahato khīṇāsavassa . Nivesanā tassa na santīti na santi na saṃvijjanti nupalabbhanti pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti nivesanā tassa na santi keci.

[171] Dhammesu niccheyya samuggahītanti dhammesūti dvāsaṭṭhiyā diṭṭhigatesu . niccheyyāti nicchinitvā vinicchinitvā vicinitvā pavicinitvā tulayitvā tīrayitvā vibhāvayitvā vibhūtaṃ katvā [1]- odhiggāho vilaggāho varaggāho koṭṭhāsaggāho uccayaggāho samuccayaggāho idaṃ saccaṃ tacchaṃ tathaṃ bhūtaṃ yāthāvaṃ aviparītanti gahitaṃ parāmaṭṭhaṃ abhiniviṭṭhaṃ ajjhositaṃ adhimuttaṃ natthi [2]- na saṃvijjati nupalabbhati pahīnaṃ samucchinnaṃ vūpasantaṃ paṭippassaddhaṃ abhabbuppattikaṃ ñāṇagginā daḍḍhanti dhammesu niccheyya samuggahītaṃ. Tenāha bhagavā Yassūbhayante paṇidhīdha natthi bhavābhavāya idha vā huraṃ vā nivesanā tassa na santi keci dhammesu niccheyya samuggahītanti.