[224] Methunamanuyuttassa (iccāyasmā tisso metteyyo) vighātaṃ brūhi mārisa sutvāna tava sāsanaṃ viveke sikkhisāmase .

[225] Methunamanuyuttassāti methunadhammo nāma yo so asaddhammo gāmadhammo vasaladhammo duṭṭhullo odakantiko rahasso dvayadvayasamāpatti . kiṃkāraṇā vuccati methunadhammo . ubhinnaṃ rattānaṃ sārattānaṃ avassutānaṃ pariyuṭṭhitānaṃ pariyādinnacittānaṃ ubhinnaṃ sadisānaṃ dhammoti taṃkāraṇā vuccati methunadhammo . Yathā ubho kalahakārakā methunakāti vuccanti ubho bhaṇḍanakārakā methunakāti vuccanti ubho bhassakārakā methunakāti vuccanti ubho vivādakārakā methunakāti vuccanti ubho adhikaraṇakārakā methunakāti vuccanti ubho vādino methunakāti vuccanti ubho sallāpakā methunakāti vuccanti evameva ubhinnaṃ rattānaṃ sārattānaṃ avassutānaṃ pariyuṭṭhitānaṃ pariyādinnacittānaṃ ubhinnaṃ sadisānaṃ dhammoti taṃkāraṇā vuccati methunadhammo . methunamanuyuttassāti methunadhamme yuttassa payuttassa āyuttassa samāyuttassa taccaritassa tabbahulassa taggarukassa tanninnassa tappoṇassa tappabbhārassa tadadhimuttassa Tadādhipateyyassāti methunamanuyuttassa.

[226] Iccāyasmā tisso metteyyoti iccāti padasandhi padasaṃsaggo padapāripūri akkharasamavāyo byañjanasiliṭṭhatā padānupubbatāmetaṃ iccāti . āyasmāti piyavacanaṃ garuvacanaṃ sagāravavacanaṃ sappatissavacanametaṃ āyasmāti . tissoti tassa therassa nāmaṃ saṅkhā samaññā paññatti vohāro nāmaṃ nāmakammaṃ nāmadheyyaṃ nirutti byañjanaṃ abhilāpo . metteyyoti tassa therassa gottaṃ saṅkhā samaññā paññatti vohāroti iccāyasmā tisso metteyyo.

[227] Vighātaṃ brūhi mārisāti vighātaṃ upaghātaṃ pīḷanaṃ ghaṭṭanaṃ upaddavaṃ upasaggaṃ brūhi ācikkha desehi paññāpehi paṭṭhapehi vivara vibhaja uttānīkarohi pakāsehi . mārisāti piyavacanaṃ garuvacanaṃ sagāravavacanaṃ sampatissavacanametaṃ mārisāti vighātaṃ brūhi mārisa.