[236] Eko pubbe caritvānāti dvīhi kāraṇehi eko pubbe caritvāna pabbajjāsaṅkhātena vā gaṇāvavassaggaṭṭhena vā. {236.1} Kathaṃ pabbajjāsaṅkhātena eko pubbe caritvāna. Sabbaṃ gharāvāsapalibodhaṃ chinditvā puttadārapalibodhaṃ chinditvā ñātipalibodhaṃ chinditvā mittāmaccapalibodhaṃ chinditvā sannidhipalibodhaṃ chinditvā kesamassuṃ ohāretvā kāsāyāni vatthāni acchādetvā agārasmā Anagāriyaṃ pabbajitvā ākiñcanabhāvaṃ upagantvā eko carati viharati iriyati vattati pāleti yapeti yāpeti evaṃ pabbajjāsaṅkhātena eko pubbe caritvāna. {236.2} Kathaṃ gaṇāvavassaggaṭṭhena eko pubbe caritvāna. So evaṃ pabbajito samāno eko araññavanapatthāni pantāni senāsanāni paṭisevati appasaddāni appanigghosāni vijanavātāni manussarāhaseyyakāni paṭisallānasārūpāni . so eko gacchati eko tiṭṭhati eko nisīdati eko seyyaṃ kappeti eko gāmaṃ piṇḍāya pavisati eko paṭikkamati eko raho nisīdati eko caṅkamaṃ adhiṭṭhāti eko carati viharati iriyati vattati pāleti yapeti yāpeti evaṃ gaṇāvavassaggaṭṭhena eko pubbe caritvāna.

[237] Methunaṃ yo nisevatīti methunadhammo nāma yo so asaddhammo .pe. taṃkāraṇā vuccati methunadhammo . Methunaṃ yo nisevatīti so aparena samayena buddhaṃ dhammaṃ saṅghaṃ sikkhaṃ paccakkhāya hīnāyāvattitvā methunadhammaṃ sevati nisevati saṃsevati paṭisevatīti methunaṃ yo nisevati.

[238] Yānaṃ bhantaṃva taṃ loketi yānanti hatthiyānaṃ assayānaṃ goyānaṃ ajayānaṃ meṇḍakayānaṃ oṭṭhayānaṃ kharayānaṃ bhantaṃ adantaṃ akāritaṃ avinītaṃ uppathaṃ gaṇhāti visamaṃ khāṇumpi pāsāṇampi abhirūhati yānampi ārohakampi bhañjati papātepi papatati . yathā taṃ Bhantaṃ yānaṃ adantaṃ akāritaṃ avinītaṃ uppathaṃ gaṇhāti evameva so vibbhantako bhantayānapaṭibhāgo uppathaṃ gaṇhāti micchādiṭṭhiṃ gaṇhāti .pe. micchāsamādhiṃ gaṇhāti . yathā taṃ bhantaṃ yānaṃ adantaṃ akāritaṃ avinītaṃ visamaṃ khāṇumpi pāsāṇampi abhirūhati evameva so vibbhantako bhantayānapaṭibhāgo visamaṃ kāyakammaṃ abhirūhati visamaṃ vacīkammaṃ abhirūhati visamaṃ manokammaṃ abhirūhati visamaṃ pāṇātipātaṃ abhirūhati visamaṃ adinnādānaṃ abhirūhati visamaṃ kāmesumicchācāraṃ abhirūhati visamaṃ musāvādaṃ abhirūhati visamaṃ pisuṇaṃ vācaṃ abhirūhati visamaṃ pharusaṃ vācaṃ abhirūhati visamaṃ samphappalāpaṃ abhirūhati visamaṃ abhijjhaṃ abhirūhati visamaṃ byāpādaṃ abhirūhati visamaṃ micchādiṭṭhiṃ abhirūhati visame saṅkhāre abhirūhati visame pañca kāmaguṇe abhirūhati visame nīvaraṇe abhirūhati. {238.1} Yathā taṃ bhantaṃ yānaṃ adantaṃ akāritaṃ avinītaṃ ārohakampi bhañjati evameva so vibbhantako bhantayānapaṭibhāgo niraye attānaṃ bhañjati tiracchānayoniyā attānaṃ bhañjati pittivisaye attānaṃ bhañjati manussaloke attānaṃ bhañjati devaloke attānaṃ bhañjati. Yathā taṃ bhantaṃ yānaṃ adantaṃ akāritaṃ avinītaṃ papātepi papatati evameva so vibbhantako bhantayānapaṭibhāgo jātipapātamhipi papatati jarāpapātamhipi papatati byādhipapātamhipi papatati maraṇapapātamhipi papatati sokaparidevadukkha- domanassupāyāsapapātamhipi papatati . loketi apāyaloke .pe. Manussaloketi yānaṃ bhantaṃva taṃ loke.