[243] Saṅkappehi pareto so kapaṇo viya jhāyati sutvā paresaṃ nigghosaṃ maṅku hoti tathāvidho.

[244] Saṅkappehi pareto so kapaṇo viya jhāyatīti kāmasaṅkappena byāpādasaṅkappena vihiṃsāsaṅkappena diṭṭhisaṅkappena phuṭṭho pareto samohito samannāgato [1]- kapaṇo viya mando viya momūho viya jhāyati pajjhāyati nijjhāyati avajjhāyati . yathā ulūko rukkhasākhāyaṃ mūsikaṃ gamayamāno jhāyati pajjhāyati nijjhāyati avajjhāyati yathā kotthu nadītīre macche gamayamāno jhāyati pajjhāyati nijjhāyati avajjhāyati yathā vilāro sandhisamalasapaṅkatīre mūsikaṃ gamayamāno jhāyati pajjhāyati nijjhāyati avajjhāyati yathā gadrabho vahacchinno sandhisamalasapaṅkatīre jhāyati pajjhāyati nijjhāyati avajjhāyati evameva so vibbhantako kāmasaṅkappena byāpādasaṅkappena vihiṃsāsaṅkappena diṭṭhisaṅkappena phuṭṭho pareto samohito samannāgato kapaṇo viya mando viya momūho viya jhāyati pajjhāyati nijjhāyati avajjhāyatīti saṅkappehi pareto so kapaṇo viya jhāyati.

[245] Sutvā paresaṃ nigghosaṃ maṅku hoti tathāvidhoti paresanti upajjhāyakā vā ācariyakā vā samānupajjhāyakā vā samānācariyakā vā mittā vā sandiṭṭhā vā sambhattā vā sahāyā vā codenti tassa te kho āvuso alābhā tassa te dulladdhaṃ yaṃ tvaṃ evarūpaṃ uḷāraṃ satthāraṃ labhitvā evaṃ svākkhāte dhammavinaye pabbajitvā evarūpaṃ ariyagaṇaṃ labhitvā hīnassa methunadhammassa kāraṇā Buddhaṃ dhammaṃ saṅghaṃ sikkhaṃ paccakkhāya hīnāyāvattosi saddhāpi nāma te nāhosi kusalesu dhammesu hiripi nāma te nāhosi kusalesu dhammesu ottappampi nāma te nāhosi kusalesu dhammesu viriyampi nāma te nāhosi kusalesu dhammesu satipi nāma te nāhosi kusalesu dhammesu paññāpi nāma te nāhosi kusalesu dhammesūti tesaṃ vacanaṃ byappathaṃ desanaṃ anusiṭṭhiṃ sutvā suṇitvā uggahetvā upadhārayitvā upalakkhayitvā maṅku hoti pīḷito ghaṭṭito byatthito domanassito hoti . tathāvidhoti tathāvidho tādiso tassaṇṭhito tappakāro tappaṭibhāgo yo so vibbhantakoti sutvā paresaṃ nigghosaṃ maṅku hoti tathāvidho. Tenāha bhagavā saṅkappehi pareto so kapaṇo viya jhāyati sutvā paresaṃ nigghosaṃ maṅku hoti tathāvidhoti.