[246] Atha satthāni kurute paravādehi codito esa khvassa mahāgedho mosavajjaṃ pagāhati.

[247] Atha satthāni kurute paravādehi coditoti athāti padasandhi padasaṃsaggo padapāripūri akkharasamavāyo byañjanasiliṭṭhatā padānupubbatāmetaṃ athāti . satthānīti tīṇi satthāni kāyasatthaṃ vacīsatthaṃ manosatthaṃ . tividhaṃ kāyaduccaritaṃ kāyasatthaṃ catubbidhaṃ vacīduccaritaṃ vacīsatthaṃ tividhaṃ manoduccaritaṃ manosatthaṃ . paravādehi coditoti upajjhāyakehi vā ācariyakehi vā samānupajjhāyakehi vā Samānācariyakehi vā mittehi vā sandiṭṭhehi vā sambhattehi vā sahāyehi vā codito sampajānamusā bhāsati abhirato ahaṃ bhante ahosiṃ pabbajjāya mātā me posetabbā tenamhi vibbhantoti bhaṇati pitā me posetabbo tenamhi vibbhantoti bhaṇati bhātā me posetabbo bhaginī me posetabbā putto me posetabbo dhītā me posetabbā mittā me posetabbā amaccā me posetabbā ñātakā me posetabbā sālohitā me posetabbā tenamhi vibbhantoti bhaṇati vacīsatthaṃ karoti [1]- janeti sañjaneti nibbatteti abhinibbattetīti atha satthāni kurute paravādehi codito.

[248] Esa khvassa mahāgedhoti eso kho assa mahāgedho mahāvanaṃ mahāgahanaṃ mahākantāro mahāvisamo mahākuṭilo mahāpaṅko mahāpalipo mahāpalibodho mahābandhanaṃ yadidaṃ sampajānamusāvādoti esa khvassa mahāgedho.

[249] Mosavajjaṃ pagāhatīti mosavajjaṃ vuccati musāvādo . Idhekacco sabhaggato vā parisaggato vā ñātimajjhagato vā pūgamajjhagato vā rājakulamajjhagato vā abhinīto sakkhipuṭṭho ehi bho purisa yaṃ jānāsi taṃ vadehīti . so ajānaṃ vā āha jānāmīti jānaṃ vā āha na jānāmīti apassaṃ vā āha passāmīti passaṃ vā āha na passāmīti iti attahetu vā Parahetu vā āmisakiñcikkhahetu vā sampajānamusā bhāsati . idaṃ vuccati mosavajjaṃ . apica tīhākārehi musāvādo hoti pubbevassa hoti musā bhaṇissanti bhaṇantassa hoti musā bhaṇāmīti bhaṇitassa hoti musā mayā bhaṇitanti imehi tīhākārehi musāvādo hoti . Apica catūhākārehi [1]- pañcahākārehi . chahākārehi . Sattahākārehi . aṭṭhahākārehi musāvādo hoti pubbevassa hoti musā bhaṇissanti bhaṇantassa hoti musā bhaṇāmīti bhaṇitassa hoti musā mayā bhaṇitanti vinidhāya diṭṭhiṃ vinidhāya khantiṃ vinidhāya ruciṃ vinidhāya saññaṃ vinidhāya bhāvaṃ imehi aṭṭhahākārehi musāvādo hoti . mosavajjaṃ pagāhatīti mosavajjaṃ pagāhati ogāhati ajjhogāhati pavisatīti mosavajjaṃ pagāhati. Tenāha bhagavā atha satthāni kurute paravādehi codito esa khvassa mahāgedho mosavajjaṃ pagāhatīti.