[250] Paṇḍitoti samaññāto ekacariyaṃ adhiṭṭhito athāpi methune yutto mandova parikissati.

[251] Paṇḍitoti samaññātoti idhekacco pubbe samaṇabhāve kittivaṇṇakato hoti paṇḍito viyatto medhāvī bahussuto cittakathī kalyāṇapaṭibhāṇo suttantikoti vā vinayadharoti vā dhammakathikoti vā .pe. nevasaññānāsaññāyatanasamāpattiyā lābhīti Vā evaṃ ñāto hoti saññāto samaññātoti paṇḍitoti samaññāto.

[252] Ekacariyaṃ adhiṭṭhitoti dvīhi kāraṇehi ekacariyaṃ adhiṭṭhito pabbajjāsaṅkhātena vā gaṇāvavassaggaṭṭhena vā . kathaṃ pabbajjāsaṅkhātena ekacariyaṃ adhiṭṭhito . sabbaṃ gharāvāsapalibodhaṃ chinditvā .pe. evaṃ pabbajjāsaṅkhātena ekacariyaṃ adhiṭṭhito . Kathaṃ gaṇāvavassaggaṭṭhena ekacariyaṃ adhiṭṭhito . so evaṃ pabbajito samāno eko araññavanapatthāni pantāni .pe. evaṃ gaṇāvavassaggaṭṭhena ekacariyaṃ adhiṭṭhitoti ekacariyaṃ adhiṭṭhito.

[253] Athāpi methune yuttoti methunadhammo nāma yo so asaddhammo .pe. taṃkāraṇā vuccati methunadhammo . athāpi methune yuttoti so aparena samayena buddhaṃ dhammaṃ saṅghaṃ sikkhaṃ paccakkhāya hīnāyāvattitvā methunadhamme yutto payutto āyutto samāyuttoti athāpi methune yutto.