[254] Mandova parikissatīti kapaṇo viya momūho viya kissati parikissati parikilissati pāṇampi hanati adinnampi ādiyati sandhimpi chindati nillopampi harati ekāgārikampi karoti paripanthepi tiṭṭhati paradārampi gacchati musāpi bhaṇati evampi kissati parikissati parikilissati . tamenaṃ rājāno gahetvā vividhā kammakāraṇā kārenti kasāhipi tāḷenti vettehipi tāḷenti Aḍḍhadaṇḍakehipi tāḷenti hatthampi chindanti pādampi chindanti hatthapādampi chindanti kaṇṇampi chindanti nāsampi chindanti kaṇṇanāsampi chindanti vilaṅgathālikampi karonti saṅkhamuṇḍikampi karonti rāhumukhampi karonti jotimālikampi karonti hatthapajjotikampi karonti erakavattikampi karonti cirakavāsikampi karonti eṇeyyakampi karonti baḷisamaṃsikampi karonti kahāpaṇakampi karonti khārāpatacchikampi karonti palighaparivattikampi karonti palālapīṭhakampi karonti tattenapi telena osiñcanti sunakhehipi khādāpenti jīvantampi sūle uttāsenti asināpi sīsaṃ chindanti evampi kissati parikissati parikilissati. {254.1} Athavā kāmataṇhāya abhibhūto pariyādinnacitto bhoge pariyesanto nāvāya mahāsamuddaṃ pakkhandati sītassa purakkhato uṇhassa purakkhato ḍaṃsamakasavātātapasiriṃsapasamphassehi rissamāno khuppipāsāya pīḷiyamāno gumabaṃ gacchati takkolaṃ gacchati takkasilaṃ gacchati kālamukhaṃ gacchati maraṇapāraṃ gacchati vesuṅgaṃ gacchati verāpathaṃ gacchati javaṃ gacchati kamaliṃ gacchati vaṅkaṃ gacchati eḷavaddanaṃ gacchati suvaṇṇakūṭaṃ gacchati suvaṇṇabhūmiṃ gacchati tambapaṇṇiṃ gacchati suppāraṃ gacchati bharukaṃ gacchati suraddhaṃ gacchati aṅgaṇekaṃ gacchati gaṅgaṇaṃ gacchati paramagaṅgaṇaṃ gacchati yonaṃ Gacchati pinaṃ gacchati allasandaṃ gacchati marukantāraṃ gacchati jaṇṇupathaṃ gacchati ajapathaṃ gacchati meṇḍapathaṃ gacchati saṅkupathaṃ gacchati chattapathaṃ gacchati vaṃsapathaṃ gacchati sakuṇapathaṃ gacchati mūsikapathaṃ gacchati daripathaṃ gacchati vettādhāraṃ gacchati evampi kissati parikissati parikilissati . pariyesanto na labhati alābhamūlakampi dukkhadomanassaṃ paṭisaṃvedeti evampi kissati parikissati parikilissati . pariyesanto labhati laddhā ca ārakkhamūlakampi dukkhadomanassaṃ paṭisaṃvedeti kinti me bhoge neva rājāno hareyyuṃ na corā hareyyuṃ na aggi ḍaheyya na udakaṃ vaheyya na appiyā dāyādā hareyyunti tassa evaṃ rakkhato gopayato [6]- bhogā vippalujjanti [7]- vippayogamūlakampi dukkhadomanassaṃ paṭisaṃvedeti evampi kissati parikissati parikilissatīti [8]- mandova parikissati. Tenāha bhagavā paṇḍitoti samaññāto ekacariyaṃ adhiṭṭhito athāpi methune yutto mandova parikissatīti.