[255] Etamādīnavaṃ ñatvā muni pubbāpare idha ekacariyaṃ daḷhaṃ kayirā na nisevetha methunaṃ.

[256] Etamādīnavaṃ ñatvā muni pubbāpare idhāti etanti pubbe samaṇabhāve yaso ca kitti ca aparabhāge buddhaṃ dhammaṃ Saṅghaṃ sikkhaṃ paccakkhāya hīnāyāvattassa ayaso ca akitti ca etaṃ sampattivipattiṃ ñatvā jānitvā tulayitvā tīrayitvā vibhāvayitvā vibhūtaṃ katvā . munīti monaṃ vuccati ñāṇaṃ yā paññā pajānanā .pe. saṅgajālamaticca so muni . idhāti imissā diṭṭhiyā imissā khantiyā imissā ruciyā imasmiṃ ādāye imasmiṃ dhamme imasmiṃ vinaye imasmiṃ dhammavinaye imasmiṃ pāvacane imasmiṃ brahmacariye imasmiṃ satthusāsane imasmiṃ attabhāve imasmiṃ manussaloketi etamādīnavaṃ ñatvā muni pubbāpare idha.

[257] Ekacariyaṃ daḷhaṃ kayirāti dvīhi kāraṇehi ekacariyaṃ daḷhaṃ kareyya pabbajjāsaṅkhātena vā gaṇāvavassaggaṭṭhena vā. {257.1} Kathaṃ pabbajjāsaṅkhātena ekacariyaṃ daḷhaṃ kareyya . Sabbaṃ gharāvāsapalibodhaṃ chinditvā puttadārapalibodhaṃ chinditvā ñātipalibodhaṃ chinditvā mittāmaccapalibodhaṃ chinditvā sannidhipalibodhaṃ chinditvā kesamassuṃ ohāretvā kāsāyāni vatthāni acchādetvā agārasmā anagāriyaṃ pabbajitvā ākiñcanabhāvaṃ upagantvā eko careyya vihareyya iriyeyya vatteyya pāleyya yapeyya yāpeyya evaṃ pabbajjāsaṅkhātena ekacariyaṃ daḷhaṃ kareyya. {257.2} Kathaṃ gaṇāvavassaggaṭṭhena ekacariyaṃ daḷhaṃ kareyya. So evaṃ pabbajito samāno eko araññavanapatthāni pantāni senāsanāni paṭiseveyya appasaddāni appanigghosāni vijanavātāni manussarāhaseyyakāni Paṭisallānasārūpāni . so eko gaccheyya eko tiṭṭheyya eko nisīdeyya eko seyyaṃ kappeyya eko gāmaṃ piṇḍāya paviseyya eko paṭikkameyya eko raho nisīdeyya eko caṅkamaṃ adhiṭṭheyya eko careyya vihareyya iriyeyya vatteyya pāleyya yapeyya yāpeyya evaṃ gaṇāvavassaggaṭṭhena ekacariyaṃ daḷhaṃ kareyya . ekacariyaṃ daḷhaṃ kareyya thiraṃ kareyya daḷhasamādāno assa avaṭṭhitasamādāno [2]- kusalesu dhammesūti ekacariyaṃ daḷhaṃ kayirā.