[258] Na nisevetha methunanti methunadhammo nāma yo so asaddhammo .pe. taṃkāraṇā vuccati methunadhammo . methunadhammaṃ na seveyya na niseveyya na saṃseveyya na paṭiseveyyāti na nisevetha methunaṃ. Tenāha bhagavā etamādīnavaṃ ñatvā muni pubbāpare idha ekacariyaṃ daḷhaṃ kayirā na nisevetha methunanti.

[259] Vivekaññeva sikkhetha etadariyānamuttamaṃ tena seṭṭho na maññetha sa ve nibbānasantike.

[260] Vivekaññeva sikkhethāti vivekoti tayo vivekā kāyaviveko cittaviveko upadhiviveko . katamo kāyaviveko .pe. Ayaṃ upadhiviveko. Kāyaviveko ca vūpakaṭṭhakāyānaṃ nekkhammābhiratānaṃ cittaviveko ca parisuddhacittānaṃ paramavodānappattānaṃ upadhiviveko Ca nirūpadhīnaṃ puggalānaṃ visaṅkhāragatānaṃ . sikkhāti tisso sikkhā adhisīlasikkhā adhicittasikkhā adhipaññāsikkhā .pe. ayaṃ adhipaññāsikkhā . vivekaññeva sikkhethāti vivekaññeva sikkheyya ācareyya samācareyya samādāya vatteyyāti vivekaññeva sikkhetha.

[261] Etadariyānamuttamanti ariyā vuccanti buddhā ca buddhasāvakā ca paccekabuddhā ca ariyānaṃ etaṃ aggaṃ seṭṭhaṃ viseṭṭhaṃ pāmokkhaṃ uttamaṃ pavaraṃ yadidaṃ vivekacariyāti etadariyānamuttamaṃ.