[266] Kāmesu anapekkhinoti kāmāti uddānato dve kāmā vatthukāmā ca kilesakāmā ca .pe. ime vuccanti vatthukāmā .pe. Ime vuccanti kilesakāmā . vatthukāme parijānitvā kilesakāme pahāya pajahitvā vinoditvā byantīkaritvā anabhāvaṅgamitvā kāmesu anapekkhavā cattakāmo vantakāmo muttakāmo pahīnakāmo paṭinissaṭṭhakāmo vītarāgo cattarāgo vantarāgo muttarāgo pahīnarāgo paṭinissaṭṭharāgo nicchāto nibbuto sītibhūto sukhapaṭisaṃvedī brahmabhūtena attanā viharatīti kāmesu anapekkhino.

[267] Oghatiṇṇassa pihayanti kāmesu gadhitā pajāti pajāti Sattādhivacanaṃ. {267.1} Pajā kāmesu rattā giddhā gadhitā mucchitā ajjhopannā laggā laggitā palibuddhā tā kāmoghaṃ tiṇṇassa bhavoghaṃ tiṇṇassa diṭṭhoghaṃ tiṇṇassa avijjoghaṃ tiṇṇassa sabbasaṃsārapathaṃ tiṇṇassa uttiṇṇassa nittiṇṇassa atikkantassa samatikkantassa vītivattassa pāragatassa pārappattassa antagatassa antappattassa koṭigatassa koṭippattassa pariyantagatassa pariyantappattassa vosānagatassa vosānappattassa tāṇagatassa tāṇappattassa leṇagatassa leṇappattassa saraṇagatassa saraṇappattassa abhayagatassa abhayappattassa accutagatassa accutappattassa amatagatassa amatappattassa nibbānagatassa nibbānappattassa icchanti sādiyanti patthayanti pihayanti abhijappanti. {267.2} Yathā iṇāyikā ānaṇyaṃ patthenti pihayanti yathā ābādhikā ārogyaṃ patthenti pihayanti yathā bandhanabandhā bandhanamokkhaṃ patthenti pihayanti yathā dāsā bhujissaṃ patthenti pihayanti yathā kantāraddhānaṃ pakkhannā khemantabhūmiṃ patthenti pihayanti evameva pajā kāmesu rattā giddhā gadhitā mucchitā ajjhopannā laggā laggitā palibuddhā tā kāmoghatiṇṇassa bhavoghatiṇṇassa .pe. nibbānagatassa nibbānappattassa icchanti sādiyanti patthayanti pihayanti abhijappantīti oghatiṇṇassa pihayanti kāmesu gadhitā pajā. Tenāha bhagavā Rittassa munino carato kāmesu anapekkhino oghatiṇṇassa pihayanti kāmesu gadhitā pajāti. Sattamo tissametteyyasuttaniddeso niṭṭhito. ----------------