[272] Paccekasaccesu puthū niviṭṭhāti puthū samaṇabrāhmaṇā puthupaccekasaccesu niviṭṭhā patiṭṭhitā allīnā upagatā ajjhositā adhimuttā sassato loko idameva saccaṃ moghamaññanti niviṭṭhā patiṭṭhitā allīnā upagatā ajjhositā adhimuttā asassato loko .pe. neva hoti na na hoti tathāgato parammaraṇā idameva saccaṃ moghamaññanti niviṭṭhā patiṭṭhitā allīnā upagatā ajjhositā Adhimuttāti paccekasaccesu puthū niviṭṭhā. Tenāha bhagavā idheva suddhiṃ iti vādayanti nāññesu dhammesu visuddhimāhu yaṃ nissitā tattha subhāvadānā paccekasaccesu puthū niviṭṭhāti.

[273] Te vādakāmā parisaṃ vigayha bālaṃ dahanti mithu aññamaññaṃ vadanti te aññasitā kathojjaṃ pasaṃsakāmā kusalāvadānā.

[274] Te vādakāmā parisaṃ vigayhāti te vādakāmāti te vādakāmā vādatthikā vādādhippāyā vādapurekkhārā vādapariyesanaṃ carantā . parisaṃ vigayhāti khattiyaparisaṃ brāhmaṇaparisaṃ gahapatiparisaṃ samaṇaparisaṃ vigayha ogayha ajjhogahetvā pavisitvāti te vādakāmā parisaṃ vigayha.

[275] Bālaṃ dahanti mithu aññamaññanti mithūti dve janā dve kalahakārakā dve bhaṇḍanakārakā dve bhassakārakā dve vivādakārakā dve adhikaraṇakārakā dve vādino dve sallāpakā te aññamaññaṃ bālato hīnato nihīnato omakato lāmakato jatukkato parittato dahanti passanti dakkhanti olokenti nijjhāyanti upaparikkhantīti bālaṃ dahanti mithu aññamaññaṃ.