[368] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena bhikkhuniyo pāyantiṃ vuṭṭhāpenti . sā piṇḍāya carati . manussā evamāhaṃsu dethayyāya bhikkhaṃ sadutiyā ayyāti . manussā ujjhāyanti khīyanti vipācenti kathaṃ hi nāma bhikkhuniyo pāyantiṃ vuṭṭhāpessantīti . assosuṃ kho bhikkhuniyo tesaṃ manussānaṃ ujjhāyantānaṃ khīyantānaṃ vipācentānaṃ . Yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma bhikkhuniyo pāyantiṃ vuṭṭhāpessantīti .pe. saccaṃ kira bhikkhave bhikkhuniyo pāyantiṃ vuṭṭhāpentīti . saccaṃ bhagavāti . vigarahi buddho bhagavā kathaṃ hi nāma bhikkhave bhikkhuniyo pāyantiṃ vuṭṭhāpessanti netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {368.1} yā pana bhikkhunī pāyantiṃ vuṭṭhāpeyya pācittiyanti.

[369] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . pāyantī nāma mātā vā hoti dhātī vā . vuṭṭhāpeyyāti upasampādeyya . vuṭṭhāpessāmīti gaṇaṃ vā ācariniṃ vā pattaṃ vā cīvaraṃ pariyesati sīmaṃ vā sammannati āpatti dukkaṭassa ñattiyā dukkaṭaṃ dvīhi kammavācāhi dukkaṭā Kammavācāpariyosāne upajjhāyāya āpatti pācittiyassa gaṇassa ca ācariniyā ca āpatti dukkaṭassa.

[370] Pāyantiyā pāyantīsaññā vuṭṭhāpeti āpatti pācittiyassa . pāyantiyā vematikā vuṭṭhāpeti āpatti dukkaṭassa . Pāyantiyā apāyantīsaññā vuṭṭhāpeti anāpatti . apāyantiyā pāyantīsaññā āpatti dukkaṭassa . apāyantiyā vematikā āpatti dukkaṭassa. Apāyantiyā apāyantīsaññā anāpatti.

[371] Anāpatti pāyantiṃ apāyantīsaññā vuṭṭhāpeti apāyantiṃ apāyantīsaññā vuṭṭhāpeti ummattikāya ādikammikāyāti. ---------