[429] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena thullanandā bhikkhunī purisasaṃsaṭṭhaṃ kumārakasaṃsaṭṭhaṃ caṇḍiṃ sokāvassaṃ caṇḍakāliṃ Sikkhamānaṃ vuṭṭhāpeti . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma ayyā thullanandā purisasaṃsaṭṭhaṃ kumārakasaṃsaṭṭhaṃ caṇḍiṃ sokāvassaṃ caṇḍakāliṃ sikkhamānaṃ vuṭṭhāpessatīti .pe. saccaṃ kira bhikkhave thullanandā bhikkhunī purisasaṃsaṭṭhaṃ kumārakasaṃsaṭṭhaṃ caṇḍiṃ sokāvassaṃ caṇḍakāliṃ sikkhamānaṃ vuṭṭhāpetīti . Saccaṃ bhagavāti. {429.1} Vigarahi buddho bhagavā kathaṃ hi nāma bhikkhave thullanandā bhikkhunī purisasaṃsaṭṭhaṃ kumārakasaṃsaṭṭhaṃ caṇḍiṃ sokāvassaṃ caṇḍakāliṃ sikkhamānaṃ vuṭṭhāpessati netaṃ bhikkhave appasannānaṃ vā pasādāya .pe. Evañca pana bhikkhave bhikkhuniyo imaṃ sikkhāpadaṃ uddisantu {429.2} yā pana bhikkhunī purisasaṃsaṭṭhaṃ kumārakasaṃsaṭṭhaṃ caṇḍiṃ sokāvassaṃ sikkhamānaṃ vuṭṭhāpeyya pācittiyanti.

[430] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . puriso nāma pattavīsativasso . Kumārako nāma appattavīsativasso . saṃsaṭṭhā nāma ananulomikena kāyikavācasikena saṃsaṭṭhā . caṇḍī nāma kodhanā vuccati . Sokāvassaṃ nāma paresaṃ dukkhaṃ uppādeti sokaṃ āvisati . sikkhamānā nāma dve vassāni chasu dhammesu sikkhitasikkhā . vuṭṭhāpeyyāti upasampādeyya . vuṭṭhāpessāmīti gaṇaṃ vā ācariniṃ vā pattaṃ vā Cīvaraṃ vā pariyesati sīmaṃ vā sammannati āpatti dukkaṭassa . Ñattiyā dukkaṭaṃ dvīhi kammavācāhi dukkaṭā kammavācāpariyosāne upajjhāyāya āpatti pācittiyassa gaṇassa ca ācariniyā ca āpatti dukkaṭassa.

[431] Anāpatti ajānantī vuṭṭhāpeti ummattikāya ādikammikāyāti. -------