[172] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena bhikkhuniyo sassakāle āmakadhaññaṃ viññāpetvā nagaraṃ abhiharanti . dvāraṭṭhāne dethayye bhāganti palibuddhitvā muñciṃsu. {172.1} Athakho tā bhikkhuniyo upassayaṃ gantvā bhikkhunīnaṃ etamatthaṃ ārocesuṃ . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma bhikkhuniyo āmakadhaññaṃ viññāpessantīti .pe. saccaṃ kira bhikkhave bhikkhuniyo āmakadhaññaṃ viññāpentīti . saccaṃ bhagavāti . vigarahi buddho bhagavā kathaṃ hi nāma bhikkhave bhikkhuniyo āmakadhaññaṃ viññāpessanti netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {172.2} yā pana bhikkhunī āmakadhaññaṃ viññāpetvā vā Viññāpāpetvā vā bhajjitvā vā bhajjāpetvā vā koṭṭetvā vā koṭṭāpetvā vā pacitvā vā pacāpetvā vā bhuñjeyya pācittiyanti.

[173] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . āmakadhaññaṃ nāma sāli vīhi yavo godhūmo kaṅgu varako kudrūsako . viññāpetvāti sayaṃ viññāpetvā . viññāpāpetvāti aññaṃ viññāpāpetvā . Bhajjitvāti sayaṃ bhajjitvā . bhajjāpetvāti aññaṃ bhajjāpetvā . Koṭṭetvāti sayaṃ koṭṭetveā . koṭṭāpetvāti aññaṃ koṭṭāpetvā . pacitvāti sayaṃ pacitvā . pacāpetvāti aññaṃ pacāpetvā . bhuñjissāmīti paṭiggaṇhāti āpatti dukkaṭassa ajjhohāre ajjhohāre āpatti pācittiyassa.

[174] Anāpatti ābādhappaccayā aparaṇṇaṃ viññāpeti ummattikāya ādikammikāyāti. ---------