[178] Tena samayena buddho bhagavā sāvatthiyaṃ viharati jetavane Anāthapiṇḍikassa ārāme . tena kho pana samayena aññatarassa brāhmaṇassa bhikkhunūpassayaṃ nissāya yavakkhettaṃ hoti . bhikkhuniyo uccāraṃpi passāvaṃpi saṅkāraṃpi vighāsaṃpi khette chaḍḍenti. {178.1} Athakho so brāhmaṇo ujjhāyati khīyati vipāceti kathaṃ hi nāma bhikkhuniyo amhākaṃ yavakkhettaṃ dūsessantīti . assosuṃ kho bhikkhuniyo tassa brāhmaṇassa ujjhāyantassa khīyantassa vipācentassa . Yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma bhikkhuniyo uccāraṃpi passāvaṃpi saṅkāraṃpi vighāsaṃpi harite chaḍḍessantīti .pe. saccaṃ kira bhikkhave bhikkhuniyo uccāraṃpi passāvaṃpi saṅkāraṃpi vighāsaṃpi harite chaḍḍentīti . saccaṃ bhagavāti . vigarahi buddho bhagavā kathaṃ hi nāma bhikkhave bhikkhuniyo uccāraṃpi passāvaṃpi saṅkāraṃpi vighāsaṃpi harite chaḍḍessanti netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {178.2} yā pana bhikkhunī uccāraṃ vā passāvaṃ vā saṅkāraṃ vā vighāsaṃ vā harite chaḍḍeyya vā chaḍḍāpeyya vā pācittiyanti.

[179] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . uccāro nāma gūtho vuccati. Passāvo nāma muttaṃ vuccati . saṅkāraṃ nāma kacavaraṃ vuccati . Vighāsaṃ nāma calakāni vā aṭṭhikāni vā ucchiṭṭhodakaṃ vā vuccati . Haritaṃ nāma pubbaṇṇaṃ aparaṇṇaṃ yaṃ manussānaṃ upabhogaparibhogaṃ Ropimaṃ . chaḍḍeyyāti sayaṃ chaḍḍeti āpatti pācittiyassa . Chaḍḍāpeyyāti aññaṃ āṇāpeti āpatti dukkaṭassa sakiṃ āṇattā bahukaṃpi chaḍḍeti āpatti pācittiyassa.

[180] Harite haritasaññā chaḍḍeti vā chaḍḍāpeti vā āpatti pācittiyassa . harite vematikā chaḍḍeti vā chaḍḍāpeti vā āpatti pācittiyassa . harite aharitasaññā chaḍḍeti vā chaḍḍāpeti vā āpatti pācittiyassa . aharite haritasaññā āpatti dukkaṭassa . aharite vematikā āpatti dukkaṭassa . aharite aharitasaññā anāpatti.