[197] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena aññatarā bhikkhunī aññatarassa kulassa kulupikā hoti niccabhattikā . athakho sā bhikkhunī pubbaṇhasamayaṃ nivāsetvā pattacīvaramādāya yena taṃ kulaṃ tenupasaṅkami upasaṅkamitvā āsane nisīditvā sāmike anāpucchā pakkāmi . tassa kulassa dāsī gharaṃ sammajjantī taṃ āsanaṃ bhājanantarikāya pakkhipi . manussā taṃ āsanaṃ apassantā taṃ bhikkhuniṃ Etadavocuṃ kahantaṃ ayye āsananti . nāhantaṃ āvuso āsanaṃ passāmīti . dehayye taṃ āsananti paribhāsitvā niccabhattaṃ pacchindiṃsu . athakho te manussā gharaṃ sodhentā taṃ āsanaṃ bhājanantarikāya passitvā taṃ bhikkhuniṃ khamāpetvā niccabhattaṃ paṭṭhapesuṃ. {197.1} Athakho sā bhikkhunī bhikkhunīnaṃ etamatthaṃ ārocesi. Yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkamissatīti .pe. saccaṃ kira bhikkhave bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkamatīti . Saccaṃ bhagavāti. Vigarahi buddho bhagavā kathaṃ hi nāma bhikkhave bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkamissati netaṃ bhikkhave appasannānaṃ vā pasādāya .pe. Evañca pana bhikkhave bhikkhuniyo imaṃ sikkhāpadaṃ uddisantu {197.2} yā pana bhikkhunī purebhattaṃ kulāni upasaṅkamitvā āsane nisīditvā sāmike anāpucchā pakkameyya pācittiyanti.

[198] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . purebhattaṃ nāma aruṇuggamanaṃ upādāya yāva majjhantikā . kulaṃ nāma cattāri kulāni khattiyakulaṃ brāhmaṇakulaṃ vessakulaṃ suddakulaṃ . upasaṅkamitvāti tattha gantvā . Āsanaṃ nāma pallaṅkassa okāso vuccati . nisīditvāti tasmiṃ nisīditvā . sāmike anāpucchā pakkameyyāti yo tasmiṃ kule manusso sāmiko dātuṃ taṃ anāpucchā . anovassikaṃ atikkamantiyā āpatti pācittiyassa . ajjhokāse upacāraṃ atikkamantiyā āpatti pācittiyassa.