[35] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena vesāliyaṃ aññatarassa licchavissa pajāpatī aticārinī hoti . athakho so Licchavī taṃ itthiṃ etadavoca sādhu viramāhi anatthaṃ kho te karissāmīti . Evaṃpi sā vuccamānā na ādiyi. Tena kho pana samayena vesāliyaṃ licchavigaṇo sannipatito hoti kenacideva karaṇīyena. {35.1} Athakho so licchavī te licchavino etadavoca ekaṃ me ayyā itthiṃ anujānāthāti . kā nāma sāti . mayhaṃ pajāpatī aticarati taṃ ghātessāmīti . jānāhīti . assosi kho sā itthī sāmiko kira maṃ ghātetukāmoti varabhaṇḍaṃ ādāya sāvatthiṃ gantvā titthiye upasaṅkamitvā pabbajjaṃ yāci . titthiyā na icchiṃsu pabbājetuṃ . Bhikkhuniyo upasaṅkamitvā pabbajjaṃ yāci . bhikkhuniyopi na icchiṃsu pabbājetuṃ . thullanandaṃ bhikkhuniṃ upasaṅkamitvā bhaṇḍakaṃ dassetvā pabbajjaṃ yāci. Thullanandā bhikkhunī bhaṇḍakaṃ gahetvā pabbājesi. {35.2} Athakho so licchavī taṃ itthiṃ gavesanto sāvatthiṃ gantvā bhikkhunīsu pabbajitaṃ disvā yena rājā pasenadi kosalo tenupasaṅkami upasaṅkamitvā rājānaṃ pasenadiṃ kosalaṃ etadavoca pajāpatī me deva varabhaṇḍaṃ ādāya sāvatthiṃ anuppattā taṃ devo anujānātūti . Tenahi bhaṇe vicinitvā ācikkhāti . diṭṭhā deva bhikkhunīsu pabbajitāti . sace bhaṇe bhikkhunīsu pabbajitā na sā labbhā kiñci kātuṃ svākkhāto [6]- dhammo caratu brahmacariyaṃ sammā dukkhassa antakiriyāyāti . athakho so licchavī ujjhāyati khīyati Vipāceti kathaṃ hi nāma bhikkhuniyo coriṃ pabbājessantīti . assosuṃ kho bhikkhuniyo tassa licchavissa ujjhāyantassa khīyantassa vipācentassa . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma ayyā thullanandā coriṃ pabbājessatīti . athakho tā bhikkhuniyo bhikkhūnaṃ etamatthaṃ ārocesuṃ .pe. saccaṃ kira bhikkhave thullanandā bhikkhunī coriṃ pabbājetīti . Saccaṃ bhagavāti . vigarahi buddho bhagavā kathaṃ hi nāma bhikkhave thullanandā bhikkhunī coriṃ pabbājessati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {35.3} yā pana bhikkhunī jānaṃ coriṃ vajjhaviditaṃ anapaloketvā rājānaṃ vā saṅghaṃ vā gaṇaṃ vā pūgaṃ vā seṇiṃ vā aññatra kappā vuṭṭhāpeyya ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesanti.