[318] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena thullanandā bhikkhunī āvasathaṃ anissajjitvā cārikaṃ pakkāmi . tena kho pana samayena thullanandāya bhikkhuniyā āvasatho dayhati . bhikkhuniyo evamāhaṃsu handayye bhaṇḍakaṃ nīharāmāti . ekaccā evamāhaṃsu na mayaṃ ayye nīharissāma yaṅkiñci naṭṭhaṃ sabbaṃ amhe abhiyuñjissatīti . Thullanandā bhikkhunī punadeva taṃ āvasathaṃ paccāgantvā bhikkhuniyo pucchi apayye bhaṇḍakaṃ nīharitthāti . na mayaṃ ayye Nīharimhāti . thullanandā bhikkhunī ujjhāyati khīyati vipāceti kathaṃ hi nāma bhikkhuniyo āvasathe dayhamāne bhaṇḍakaṃ na nīharissantīti. {318.1} Yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma ayyā thullanandā āvasathaṃ anissajjitvā cārikaṃ pakkamissatīti .pe. saccaṃ kira bhikkhave thullanandā bhikkhunī āvasathaṃ anissajjitvā cārikaṃ pakkamatīti . Saccaṃ bhagavāti. {318.2} Vigarahi buddho bhagavā kathaṃ hi nāma bhikkhave thullanandā bhikkhunī āvasathaṃ anissajjitvā cārikaṃ pakkamissati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {318.3} yā pana bhikkhunī āvasathaṃ anissajjitvā cārikaṃ pakkameyya pācittiyanti.

[319] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . āvasatho nāma kavāṭabaddho vuccati . anissajjitvā cārikaṃ pakkameyyāti bhikkhuniyā vā sikkhamānāya vā sāmaṇeriyā vā anissajjitvā parikkhittassa āvasathassa parikkhepaṃ atikkamantiyā āpatti pācittiyassa . aparikkhittassa āvasathassa upacāraṃ atikkamantiyā āpatti pācittiyassa.

[320] Anissajjite anissajjitasaññā pakkamati āpatti pācittiyassa anissajjite vematikā pakkamati āpatti pācittiyassa . Anissajjite nissajjitasaññā pakkamati āpatti pācittiyassa . Akavāṭabaddhaṃ anissajjitvā pakkamati āpatti dukkaṭassa . Nissajjite anissajjitasaññā āpatti dukkaṭassa . nissajjite vematikā āpatti dukkaṭassa . nissajjite nissajjitasaññā anāpatti.