[40] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena bhaddāya kāpilāniyā antevāsinī bhikkhunīhi saddhiṃ bhaṇḍitvā gāmake ñātikulaṃ agamāsi . bhaddā kāpilānī taṃ bhikkhuniṃ apassantī bhikkhuniyo pucchi kahaṃ itthannāmā na dissatīti . bhikkhunīhi saddhiṃ ayye bhaṇḍitvā na dissatīti . ammā amukasmiṃ gāmake etissā ñātikulaṃ tattha gantvā vicinathāti. {40.1} Bhikkhuniyo tattha gantvā taṃ bhikkhuniṃ passitvā etadavocuṃ kissa tvaṃ ayye ekikā āgatā kaccisi appadhaṃsitāti . appadhaṃsitamhi ayyeti . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma bhikkhunī ekā gāmantaraṃ gacchissatīti .pe. Saccaṃ kira bhikkhave bhikkhunī ekā gāmantaraṃ gacchatīti. Saccaṃ bhagavāti. Vigarahi buddho bhagavā kathaṃ hi nāma bhikkhave bhikkhunī ekā gāmantaraṃ gacchissati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {40.2} yā pana bhikkhunī ekā gāmantaraṃ gaccheyya ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesanti. {40.3} Evañcidaṃ bhagavatā bhikkhunīnaṃ sikkhāpadaṃ paññattaṃ hoti.

[41] Tena kho pana samayena dve bhikkhuniyo sāketā sāvatthiṃ addhānamaggapaṭipannā honti . antarāmagge nadī taritabbā hoti . Athakho tā bhikkhuniyo nāvike upasaṅkamitvā etadavocuṃ sādhu no āvuso tārethāti . nāyye sakkā ubho sakiṃ tāretunti. Eko ekaṃ uttāresi . uttiṇṇo uttiṇṇaṃ dūsesi . anuttiṇṇo anuttiṇṇaṃ dūsesi . tā pacchā samāgantvā pucchiṃsu kaccisi ayye appadhaṃsitāti . padhaṃsitamhi ayye tvaṃ panayye appadhaṃsitāti . Padhaṃsitamhi ayyeti . athakho tā bhikkhuniyo sāvatthiṃ gantvā bhikkhunīnaṃ etamatthaṃ ārocesuṃ . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma bhikkhunī ekā nadīpāraṃ gacchissatīti . athakho tā bhikkhuniyo bhikkhūnaṃ etamatthaṃ ārocesuṃ . Bhikkhū bhagavato etamatthaṃ ārocesuṃ .pe. saccaṃ kira bhikkhave bhikkhunī ekā nadīpāraṃ gacchantīti . saccaṃ bhagavāti . vigarahi buddho bhagavā kathaṃ hi nāma bhikkhave bhikkhunī ekā nadīpāraṃ gacchissati Netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {41.1} yā pana bhikkhunī ekā vā gāmantaraṃ gaccheyya ekā vā nadīpāraṃ gaccheyya ayampi bhikkhunī paṭhamāpattikaṃ dhammaṃ āpannā nissāraṇīyaṃ saṅghādisesanti . evañcidaṃ bhagavatā bhikkhunīnaṃ sikkhāpadaṃ paññattaṃ hoti.