[358] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena bhikkhuniyo uposathaṃpi na pucchanti ovādaṃpi na yācanti . bhikkhū ujjhāyanti khīyanti vipācenti kathaṃ hi nāma bhikkhuniyo uposathaṃpi na pucchissanti ovādaṃpi na yācissantīti .pe. saccaṃ kira bhikkhave bhikkhuniyo uposathaṃpi na pucchanti ovādaṃpi na yācantīti. Saccaṃ bhagavāti. {358.1} Vigarahi buddho bhagavā kathaṃ hi nāma bhikkhave bhikkhuniyo uposathaṃpi na pucchissanti ovādaṃpi na yācissanti netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu anvaḍḍhamāsaṃ pana bhikkhuniyā bhikkhusaṅghato dve dhammā Paccāsiṃsitabbā uposathapucchakañca ovādupasaṅkamanañca taṃ atikkāmentiyā pācittiyanti.

[359] Anvaḍḍhamāsanti anuposathikaṃ . uposatho nāma dve uposathā cātuddasiko ca paṇṇarasiko ca . ovādo nāma aṭṭha garudhammā . uposathaṃpi na pucchissāmi ovādaṃpi na yācissāmīti dhuraṃ nikkhittamatte āpatti pācittiyassa.

[360] Anāpatti sati antarāye pariyesitvā dutiyikaṃ bhikkhuniṃ na labhati gilānāya āpadāsu ummattikāya ādikammikāyāti. --------