[242] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena bhikkhunīsaṅghassa akālacīvaraṃ uppannaṃ hoti . athakho bhikkhunīsaṅgho taṃ cīvaraṃ bhājetukāmo sannipati . tena kho pana samayena thullanandāya bhikkhuniyā antevāsiniyo bhikkhuniyo pakkantā honti . thullanandā bhikkhunī tā bhikkhuniyo etadavoca ayye bhikkhuniyo pakkantā na tāva cīvaraṃ bhājiyissatīti cīvaravibhaṅgaṃ paṭibāhi . bhikkhuniyo na tāva cīvaraṃ bhājiyissatīti vippakkamiṃsu . thullanandā bhikkhunī antevāsinīsu bhikkhunīsu āgatāsu taṃ cīvaraṃ bhājāpesi . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma ayyā thullanandā dhammikaṃ cīvaravibhaṅgaṃ paṭibāhissatīti .pe. Saccaṃ kira bhikkhave thullanandā bhikkhunī dhammikaṃ cīvaravibhaṅgaṃ paṭibāhatīti . Saccaṃ bhagavāti. {242.1} Vigarahi buddho bhagavā kathaṃ hi nāma bhikkhave thullanandā bhikkhunī dhammikaṃ cīvaravibhaṅgaṃ paṭibāhissati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {242.2} yā pana bhikkhunī dhammikaṃ Cīvaravibhaṅgaṃ paṭibāheyya pācittiyanti.

[243] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . dhammiko nāma cīvaravibhaṅgo samaggo bhikkhunīsaṅgho sannipatitvā bhājeti . paṭibāheyyāti kathaṃ imaṃ cīvaraṃ bhājeyyāti paṭibāhati āpatti pācittiyassa.

[244] Dhammike dhammikasaññā paṭibāhati āpatti pācittiyassa . Dhammike vematikā paṭibāhati āpatti dukkaṭassa . dhammike adhammikasaññā paṭibāhati anāpatti . adhammike dhammikasaññā āpatti dukkaṭassa . adhammike vematikā āpatti dukkaṭassa . Adhammike adhammikasaññā anāpatti.

[245] Anāpatti ānisaṃsaṃ dassetvā paṭibāhati ummattikāya ādikammikāyāti. -------