[246] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena thullanandā bhikkhunī naṭānaṃpi naṭakānaṃpi saṅghikānaṃpi sokajjhāyikānaṃpi kumbhathūnikānaṃpi samaṇacīvaraṃ deti mayhaṃ parisati vaṇṇaṃ bhāsathāti . Naṭāpi naṭakāpi saṅghikāpi sokajjhāyikāpi kumbhathūnikāpi thullanandāya bhikkhuniyā parisati vaṇṇaṃ bhāsanti ayyā thullanandā bahussutā Bhāṇikā visāradā paṭṭhā dhammiṃ kathaṃ kātuṃ detha ayyāya karotha ayyāyāti . yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma ayyā thullanandā āgārikassa samaṇacīvaraṃ dassatīti .pe. saccaṃ kira bhikkhave thullanandā bhikkhunī āgārikassa samaṇacīvaraṃ detīti. Saccaṃ bhagavāti. {246.1} Vigarahi buddho bhagavā kathaṃ hi nāma bhikkhave thullanandā bhikkhunī āgārikassa samaṇacīvaraṃ dassati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {246.2} yā pana bhikkhunī āgārikassa vā paribbājakassa vā paribbājikāya vā samaṇacīvaraṃ dadeyya pācittiyanti.

[247] Yā panāti yā yādisā .pe. bhikkhunīti .pe. ayaṃ imasmiṃ atthe adhippetā bhikkhunīti . āgāriko nāma yo koci agāraṃ ajjhāvasati . paribbājako nāma bhikkhuñca sāmaṇerañca ṭhapetvā yo koci paribbājakasamāpanno . paribbājikā nāma bhikkhuniñca sikkhamānañca sāmaṇeriñca ṭhapetvā yā kāci paribbājikasamāpannā . samaṇacīvaraṃ nāma kappakataṃ vuccati . Deti āpatti pācittiyassa.

[248] Anāpatti mātāpitūnaṃ deti tāvakālikaṃ deti ummattikāya ādikammikāyāti.