[298] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena bhikkhuniyo āsandiṃpi pallaṅkaṃpi paribhuñjanti . manussā vihāracārikaṃ āhiṇḍantā passitvā ujjhāyanti khīyanti vipācenti kathaṃ hi nāma bhikkhuniyo āsandiṃpi pallaṅkaṃpi paribhuñjissanti seyyathāpi gihiniyo kāmabhoginiyoti . Assosuṃ kho bhikkhuniyo tesaṃ manussānaṃ ujjhāyantānaṃ khīyantānaṃ vipācentānaṃ. {298.1} Yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma bhikkhuniyo āsandiṃpi pallaṅkaṃpi paribhuñjissanti .pe. saccaṃ kira bhikkhave bhikkhuniyo āsandiṃpi pallaṅkaṃpi paribhuñjantīti. Saccaṃ bhagavāti. {298.2} Vigarahi buddho bhagavā kathaṃ hi nāma bhikkhave bhikkhuniyo āsandiṃpi pallaṅkaṃpi paribhuñjissanti netaṃ bhikkhave appasannānaṃ vā pasādāya .pe. Evañca pana bhikkhave bhikkhuniyo imaṃ sikkhāpadaṃ uddisantu {298.3} yā pana bhikkhunī āsandiṃ vā pallaṅkaṃ vā paribhuñjeyya pācittiyanti.

[299] Yā panāti yā yādisā .pe. bhikkhunīti .pe. ayaṃ Imasmiṃ atthe adhippetā bhikkhunīti . āsandi nāma atikkantappamāṇā vuccati . pallaṅko nāma āharimehi vālehi kato hoti. Paribhuñjeyyāti tasmiṃ abhinisīdati vā abhinipajjati vā āpatti pācittiyassa.

[300] Anāpatti āsandiyā pāde chinditvā paribhuñjati pallaṅkassa vāle bhinditvā paribhuñjati ummattikāya ādikammikāyāti.