[18] Tena samayena buddho bhagavā sāvatthiyaṃ viharati jetavane anāthapiṇḍikassa ārāme . tena kho pana samayena thullanandā bhikkhunī samaggena saṅghena ukkhittaṃ ariṭṭhaṃ bhikkhuṃ gandhabādhipubbaṃ anuvattati. Yā tā bhikkhuniyo appicchā .pe. tā ujjhāyanti khīyanti vipācenti kathaṃ hi nāma ayyā thullanandā samaggena saṅghena ukkhittaṃ ariṭṭhaṃ bhikkhuṃ gandhabādhipubbaṃ anuvattissatīti .pe. Saccaṃ kira bhikkhave thullanandā bhikkhunī samaggena saṅghena ukkhittaṃ ariṭṭhaṃ gandhabādhipubbaṃ anuvattatīti . saccaṃ bhagavāti . vigarahi buddho bhagavā kathaṃ hi nāma bhikkhave thullanandā bhikkhunī samaggena saṅghena ukkhittaṃ ariṭṭhaṃ gandhabādhipubbaṃ anuvattissati netaṃ bhikkhave appasannānaṃ vā pasādāya .pe. evañca pana bhikkhave bhikkhuniyo imaṃ sikkhāpadaṃ uddisantu {18.1} yā pana bhikkhunī samaggena saṅghena ukkhittaṃ bhikkhuṃ dhammena vinayena satthusāsanena anādaraṃ appaṭikāraṃ akatasahāyaṃ tamanuvatteyya sā bhikkhunī bhikkhunīhi evamassa vacanīyā eso kho ayye bhikkhu samaggena saṅghena ukkhitto dhammena vinayena satthusāsanena anādaro appaṭikāro akatasahāyo māyye etaṃ bhikkhuṃ anuvattīti evañca sā bhikkhunī bhikkhunīhi vuccamānā tatheva paggaṇheyya sā bhikkhunī bhikkhunīhi Yāvatatiyaṃ samanubhāsitabbā tassa paṭinissaggāya yāvatatiyañce samanubhāsiyamānā taṃ paṭinissajjeyya iccetaṃ kusalaṃ no ce paṭinissajjeyya ayampi pārājikā hoti asaṃvāsā ukkhittānuvattikāti.

[19] Yā panāti yā yādisā .pe. Ayaṃ imasmiṃ atthe adhippetā bhikkhunīti . samaggo nāma saṅgho samānasaṃvāsako samānasīmāyaṃ ṭhito . ukkhitto nāma āpattiyā adassane vā appaṭikamme vā appaṭinissagge vā ukkhitto . dhammena vinayenāti yena dhammena yena vinayena . satthusāsanenāti jinasāsanena buddhasāsanena. Anādaro nāma saṅghaṃ vā [4]- puggalaṃ vā kammaṃ vā nādiyati . Appaṭikāro nāma ukkhitto anosārito . akatasahāyo nāma samānasaṃvāsakā bhikkhū vuccanti sahāyā so tehi saddhiṃ natthi tena vuccati akatasahāyoti . tamanuvatteyyāti yaṃdiṭṭhiko so hoti yaṃkhantiko yaṃruciko sāpi taṃdiṭṭhikā hoti taṃkhantikā taṃrucikā.