[100] Kodha santusito loke (iccāyasmā tissametteyyo) kassa no santi iñjitā ko ubhantamabhiññāya majjhe mantā na limpati kaṃ brūsi mahāpurisoti ko idha sibbanimaccagāti .

[101] Kodha santusito loketi [3]- santuṭṭho attamano paripuṇṇasaṅkappoti kodha santusito loke . iccāyasmā tissametteyyoti iccāti padasandhi padasaṃsaggo padapāripūri akkharasamavāyo byañjanasiliṭṭhatā padānupubbakametaṃ iccāti . āyasmāti piyavacanaṃ garuvacanaṃ sagāravasappatissādhivacanametaṃ āyasmāti . tissāti tassa brāhmaṇassa nāmaṃ saṅkhā samaññā paññatti vohāro nāmaṃ nāmakammaṃ nāmadheyyaṃ nirutti byañjanaṃ abhilāpo . metteyyāti tassa brāhmaṇassa gottaṃ saṅkhā samaññā paññatti vohāroti iccāyasmā tissametteyyo.

[102] Kassa no santi iñjitāti taṇhiñjitaṃ diṭṭhiñjitaṃ māniñjitaṃ kilesiñjitaṃ kammiñjitaṃ kassime iñjitā natthi na santi na saṃvijjanti nūpalabbhanti pahīnā samucchinnā vūpasantā Paṭippassaddhā abhabbuppattikā ñāṇagginā daḍḍhāti kassa no santi iñjitā.

[103] Ko ubhantamabhiññāyāti ko ubho ante abhiññāya jānitvā tulayitvā tirayitvā vibhāvayitvā vibhūtaṃ katvāti ko ubhantamabhiññāya.