[242] Eko ahaṃ sakka mahantamoghaṃ (iccāyasmā upasīvo) anissito no visahāmi tārituṃ ārammaṇaṃ brūhi samantacakkhu yaṃ nissito oghamimaṃ tareyyaṃ.

[243] Eko ahaṃ sakka mahantamoghanti ekoti puggalo vā me dutiyo natthi dhammo vā me dutiyo natthi yaṃ vā puggalaṃ nissāya dhammaṃ vā nissāya mahantaṃ kāmoghaṃ bhavoghaṃ diṭṭhoghaṃ avijjoghaṃ tareyyaṃ uttareyyaṃ patareyyaṃ samatikkameyyaṃ vītivatteyyanti eko . sakkāti sakko . Bhagavā sakyakulā pabbajitotipi sakko. Athavā addho mahaddhano dhanavātipi sakko . tassimāni dhanāni seyyathīdaṃ saddhādhanaṃ sīladhanaṃ hiridhanaṃ ottappadhanaṃ sutadhanaṃ cāgadhanaṃ paññādhanaṃ satipaṭṭhānadhanaṃ .pe. nibbānadhanaṃ . imehi anekavidhehi dhanaratanehi addho mahaddhano dhanavātipi sakko . athavā sakko pahu visavī alamatto sūro vīro vikkanto abhiru acchambhī anutrāsī apalāyī pahīnabhayabheravo vigatalomahaṃsotipi sakkoti eko ahaṃ sakka mahantamoghaṃ . iccāyasmā upasīvoti iccāti padasandhi . āyasmāti piyavacanaṃ . upasīvoti tassa brāhmaṇassa nāmaṃ .pe. Abhilāpoti iccāyasmā upasīvo.

[244] Anissito no visahāmi tāritunti anissitoti puggalaṃ vā anissito dhammaṃ vā anissito . no visahāmīti na ussahāmi na sakkomi na paṭibalo . tāritunti mahantaṃ kāmoghaṃ bhavoghaṃ diṭṭhoghaṃ avijjoghaṃ tārituṃ uttarituṃ patarituṃ samatikkamituṃ vītivattitunti anissito no visahāmi tārituṃ.

[245] Ārammaṇaṃ brūhi samantacakkhūti ārammaṇaṃ brūhīti ārammaṇaṃ ālambaṇaṃ nissayaṃ upanissayaṃ brūhi ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti ārammaṇaṃ brūhi . samantacakkhūti samantacakkhu vuccati sabbaññutañāṇaṃ. Bhagavā tena sabbaññutañāṇena upeto samupeto upāgato samupāgato upapanno samupapanno samannāgato. Na tassa adiṭṭhamidhatthi kiñci atho aviññātamajānitabbaṃ sabbaṃ abhiññāsi yadatthi neyyaṃ tathāgato tena samantacakkhūti. Ārammaṇaṃ brūhi samantacakkhu.