[324] Yeme pubbe viyākaṃsu (iccāyasmā hemako) huraṃ gotamasāsanā iccāsi iti bhavissati sabbantaṃ itihītihaṃ sabbantaṃ takkavaḍḍhanaṃ nāhaṃ tattha abhiramiṃ.

[325] Yeme pubbe viyākaṃsūti yeti yo ca bāvarī brāhmaṇo ye caññe tassa ācariyā te sakaṃ diṭṭhiṃ sakaṃ khantiṃ sakaṃ ruciṃ sakaṃ laddhiṃ sakaṃ ajjhāsayaṃ sakaṃ adhippāyaṃ byākariṃsu ācikkhiṃsu desayiṃsu paññapiṃsu paṭṭhapiṃsu vivariṃsu vibhajiṃsu uttānīmakaṃsu pakāsesunti yeme pubbe viyākaṃsu . iccāyasmā hemakoti iccāti padasandhi .pe. padānupubbakametaṃ iccāti . āyasmāti piyavacanaṃ garuvacanaṃ sagāravasappatissādhivacanametaṃ āyasmāti . hemakoti nāmaṃ .pe. Abhilāpoti iccāyasmā hemako.

[326] Huraṃ gotamasāsanāti huraṃ gotamasāsanā paraṃ gotamasāsanā pure gotamasāsanā paṭhamataraṃ gotamasāsanā buddhasāsanā jinasāsanā tathāgatasāsanā arahantasāsanāti huraṃ gotamasāsanā.

[327] Iccāsi iti bhavissatīti evaṃ kira asi evaṃ kira Bhavissatīti iccāsi iti bhavissati.