[336] Idha diṭṭhasutamutaṃ (viññātesu) piyarūpesu hemaka chandarāgavinodanaṃ nibbānapadamaccutaṃ.

[337] Idha diṭṭhasutamutaṃ viññātesūti diṭṭhanti cakkhunā diṭṭhaṃ . sutanti sotena sutaṃ . mutanti mutaṃ ghānena ghāyitaṃ jivhāya sāyitaṃ kāyena phuṭṭhaṃ . viññātanti manasā ñātanti idha diṭṭhasutamutaṃ viññātesu.

[338] Piyarūpesu hemakāti kiñca loke piyarūpaṃ sātarūpaṃ . Cakkhuṃ loke piyarūpaṃ sātarūpaṃ sotaṃ ghānaṃ jivhā kāyo mano loke piyarūpaṃ sātarūpaṃ rūpaṃ loke piyarūpaṃ sātarūpaṃ saddā gandhā rasā phoṭṭhabbā dhammā loke piyarūpaṃ sātarūpaṃ cakkhuviññāṇaṃ loke piyarūpaṃ sātarūpaṃ sotaviññāṇaṃ ghānaviññāṇaṃ jivhāviññāṇaṃ kāyaviññāṇaṃ manoviññāṇaṃ loke piyarūpaṃ sātarūpaṃ cakkhusamphasso loke piyarūpaṃ sātarūpaṃ sotasamphasso ghānasamphasso jivhāsamphasso kāyasamphasso manosamphasso loke piyarūpaṃ sātarūpaṃ cakkhusamphassajā vedanā loke piyarūpaṃ sātarūpaṃ sotasamphassajā vedanā ghānasamphassajā vedanā jivhāsamphassajā vedanā kāyasamphassajā vedanā manosamphassajā vedanā loke piyarūpaṃ sātarūpaṃ rūpasaññā loke piyarūpaṃ sātarūpaṃ saddasaññā gandhasaññā rasasaññā phoṭṭhabbasaññā dhammasaññā loke piyarūpaṃ sātarūpaṃ rūpasañcetanā loke piyarūpaṃ sātarūpaṃ saddasañcetanā gandhasañcetanā rasasañcetanā phoṭṭhabbasañcetanā dhammasañcetanā loke piyarūpaṃ sātarūpaṃ rūpataṇhā loke piyarūpaṃ sātarūpaṃ saddataṇhā gandhataṇhā rasataṇhā phoṭṭhabbataṇhā dhammataṇhā loke piyarūpaṃ sātarūpaṃ rūpavitakko loke piyarūpaṃ sātarūpaṃ saddavitakko gandhavitakko rasavitakko phoṭṭhabbavitakko dhammavitakko loke piyarūpaṃ sātarūpaṃ rūpavicāro loke piyarūpaṃ sātarūpaṃ saddavicāro gandhavicāro rasavicāro phoṭṭhabbavicāro Dhammavicāro loke piyarūpaṃ sātarūpanti piyarūpesu . Hemakāti bhagavā taṃ brāhmaṇaṃ nāmena ālapati.