[388] Sutvānahaṃ vīra akāmakāmiṃ (iccāyasmā jatukaṇṇī) oghātigaṃ puṭṭhumakāmamāgamaṃ santipadaṃ brūhi sahājanetta yathātacchaṃ bhagavā brūhi me taṃ.

[389] Sutvānahaṃ vīra akāmakāminti sutvā suṇitvā uggahetvā upadhāretvā upalakkhayitvā itipi so bhagavā arahaṃ .pe. Buddho bhagavāti sutvānahaṃ . vīrāti vīro . bhagavā viriyavāti vīro. Pahūti vīro . visavīti vīro . alamattoti vīro. Sūro vikkanto abhiru acchambhī anutrāsī apalāyī pahīnabhayabheravo vigatalomahaṃsoti vīro. Virato idha sabbāpāpakehi nirayadukkhamaticca viriyavāso so viriyavā padhānavā vīro tādi pavuccate tathattāti. Sutvānahaṃ vīra . akāmakāminti kāmāti uddānato dve kāmā vatthukāmā ca kilesakāmā ca .pe. ime vuccanti vatthukāmā .pe. ime vuccanti kilesakāmā . buddhassa bhagavato vatthukāmā pariññātā kilesakāmā pahīnā vatthukāmānaṃ pariññātattā Kilesakāmānaṃ pahīnattā bhagavā na kāme kāmeti kāmā seṭṭhāti na kāme pamodati na kāme abhijappati tasmā buddho akāmo nikkāmo cattakāmo vantakāmo muttakāmo pahīnakāmo paṭinissaṭṭhakāmo vītarāgo vigatarāgo cattarāgo vantarāgo muttarāgo pahīnarāgo paṭinissaṭṭharāgo nicchāto nibbuto sītibhūto sukhapaṭisaṃvedī brahmabhūtena attanā viharatīti sutvānahaṃ vīra akāmakāmiṃ . Iccāyasmā jatukaṇṇīti iccāti padasandhi .pe. padānupubbakametaṃ iccāti . āyasmāti piyavacanaṃ sagāravasappatissādhivacanametaṃ āyasmāti . jatukaṇṇīti tassa brāhmaṇassa gottaṃ .pe. Vohāroti iccāyasmā jatukaṇṇī.

[390] Oghātigaṃ puṭṭhumakāmamāgamanti oghātiganti oghātigaṃ oghaṃ atikkantaṃ samatikkantaṃ vītivattanti oghātigaṃ . puṭṭhunti puṭṭhuṃ pucchituṃ yācituṃ ajjhesituṃ pasādetuṃ . akāmamāgamanti akāmaṃ puṭṭhuṃ nikkāmaṃ cattakāmaṃ vantakāmaṃ muttakāmaṃ pahīnakāmaṃ paṭinissaṭṭhakāmaṃ vītarāgaṃ [3]- cattarāgaṃ vantarāgaṃ muttarāgaṃ pahīnarāgaṃ paṭinissaṭṭharāgaṃ āgamhā āgatamhā upāgatamhā sampattamhā tayā saddhiṃ samāgatamhāti oghātigaṃ puṭṭhumakāmamāgamaṃ.