[394] Bhagavā hi kāme abhibhuyya iriyatīti bhagavāti gāravādhivacanametaṃ .pe. sacchikā paññatti yadidaṃ bhagavāti . kāmeti uddānato dve kāmā vatthukāmā ca kilesakāmā ca .pe. ime vuccanti vatthukāmā .pe. ime vuccanti kilesakāmā . bhagavā vatthukāme parijānitvā kilesakāme pahāya abhibhuyya abhibhavitvā ajjhottharitvā pariyādayitvā madditvā carati [2]- iriyati vatteti pāleti yapeti yāpetīti bhagavā hi kāme abhibhuyya iriyati.

[395] Ādiccova paṭhaviṃ tejī tejasāti ādicco vuccati suriyo . Paṭhavī vuccati jarā . Yathā suriyo tejī tejasā tejena samannāgato paṭhaviṃ abhibhuyya abhibhavitvā ajjhottharitvā pariyādayitvā santāpayitvā sabbaṃ ākāsagataṃ [6]- abhivihacca andhakāraṃ vidhamitvā ālokaṃ dassetvā ākāse antalikkhe gamanapathe gacchati Evameva bhagavā ñāṇatejī ñāṇatejena samannāgato sabbaṃ abhisaṅkhārasamudayaṃ .pe. kilesatamaṃ avijjandhakāraṃ vidhamitvā ñāṇālokaṃ dassetvā vatthukāme parijānitvā kilesakāme pahāya abhibhuyya abhibhavitvā ajjhottharitvā pariyādayitvā madditvā carati iriyati vatteti pāleti yapeti yāpetīti ādiccova paṭhaviṃ tejī tejasā.

[396] Parittapaññassa me bhūripaññoti ahamasmi parittapañño omakapañño [1]- jatukapañño tvaṃpi mahāpañño puthupañño hāsapañño javanapañño tikkhapañño nibbedhikapañño bhūri vuccati paṭhavī tāya paṭhavīsamāya paññāya vipulāya vitthatāya samannāgatoti parittapaññassa me bhūripañño.

[397] Ācikkha dhammaṃ yamahaṃ vijaññanti ācikkha dhammanti ādikalyāṇaṃ majjhekalyāṇaṃ pariyosānakalyāṇaṃ sātthaṃ sabyañjanaṃ kevalaparipuṇṇaṃ parisuddhaṃ brahmacariyaṃ cattāro satipaṭṭhāne .pe. Nibbānañca nibbānagāminiñca paṭipadaṃ ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti ācikkha dhammaṃ . yamahaṃ vijaññanti yamahaṃ jāneyyaṃ vijāneyyaṃ paṭivijāneyyaṃ paṭivijjheyyaṃ adhigaccheyyaṃ phuseyyaṃ sacchikareyyanti ācikkha dhammaṃ yamahaṃ vijaññaṃ.