[410] Sabbaso nāmarūpasmiṃ vītagedhassa brāhmaṇāti sabbasoti sabbena sabbaṃ sabbathā sabbaṃ asesaṃ nissesaṃ pariyādāyavacanametaṃ sabbasoti . nāmanti cattāro arūpino khandhā . rūpanti cattāro ca mahābhūtā catunnañca mahābhūtānaṃ upādāyarūpaṃ . gedho vuccati taṇhā yo rāgo sārāgo .pe. abhijjhā lobho akusalamūlaṃ . sabbaso nāmarūpasmiṃ vītagedhassa brāhmaṇāti sabbaso nāmarūpasmiṃ vītagedhassa vigatagedhassa cattagedhassa vantagedhassa Muttagedhassa pahīnagedhassa paṭinissaṭṭhagedhassa vītarāgassa vigatarāgassa cattarāgassa vantarāgassa muttarāgassa pahīnarāgassa paṭinissaṭṭharāgassāti sabbaso nāmarūpasmiṃ vītagedhassa brāhmaṇa.

[411] Āsavassa na vijjantīti āsavāti cattāro āsavā kāmāsavo bhavāsavo diṭṭhāsavo avijjāsavo . assāti arahato khīṇāsavassa . na vijjantīti ime āsavā tassa natthi na santi na saṃvijjanti nupalabbhanti pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti āsavassa na vijjanti.

[412] Yehi maccuvasaṃ vajeti yehi āsavehi maccuno vā vasaṃ gaccheyya maraṇassa vā vasaṃ gaccheyya mārapakkhassa vā vasaṃ gaccheyya te āsavā assa natthi na santi na saṃvijjanti nupalabbhanti pahīnā samucchinnā vūpasantā paṭippassaddhā abhabbuppattikā ñāṇagginā daḍḍhāti yehi maccuvasaṃ vaje. Tenāha bhagavā sabbaso nāmarūpasmiṃ vītagedhassa brāhmaṇa āsavassa na vijjanti yehi maccuvasaṃ vajeti. Saha gāthāpariyosānā .pe. satthā me bhante bhagavā sāvakohamasmīti. Jatukaṇṇīmāṇavakapañhāniddeso ekādasamo. ---------------