[420] Tava vīra vākyaṃ abhikaṅkhamānāti vīrāti vīro . Bhagavā viriyavāti vīro . pahūti vīro . visavīti vīro . Alamattoti vīro .pe. Vigatalomahaṃsoti vīro. Virato idha sabbapāpakehi nirayadukkhamaticca viriyavāso so viriyavā padhānavā vīro tādi pavuccate tathattāti. Tava vīra vākyaṃ abhikaṅkhamānāti tuyhaṃ vacanaṃ byapathaṃ desanaṃ anusandhiṃ . abhikaṅkhamānāti kaṅkhamānā abhikaṅkhamānā icchamānā sādiyamānā patthayamānā pihayamānā abhijappamānāti tava vīra vākyaṃ abhikaṅkhamānā.

[421] Tesaṃ tuvaṃ sādhu viyākarohīti tesanti tesaṃ khattiyānaṃ brāhmaṇānaṃ vessānaṃ suddānaṃ gahaṭṭhānaṃ pabbajitānaṃ devānaṃ manussānaṃ . tuvanti bhagavantaṃ bhaṇati . sādhu viyākarohīti sādhu ācikkhāhi desehi paññapehi paṭṭhapehi vivarāhi vibhajāhi uttānīkarohi pakāsehīti sādhu viyākarohi.

[422] Tathāhi te vidito esa dhammoti tathāhi te vidito ñāto tulito tīrito vibhāvito vibhūto esa dhammoti tathāhi te vidito esa dhammo. Tenāha so brāhmaṇo nānājanā janapadehi saṅgatā tava vīra vākyaṃ abhikaṅkhamānā tesaṃ tuvaṃ sādhu viyākarohi Tathāhi te vidito esa dhammoti.

[423] Ādānataṇhaṃ vinayetha sabbaṃ (bhadrāvudhāti bhagavā) uddhaṃ adho tiriyaṃ vāpi majjhe yaṃ yaṃ hi lokasmiṃ upādiyanti teneva māro anveti jantuṃ.