[424] Ādānataṇhaṃ vinayetha sabbanti ādānataṇhā vuccati rūpataṇhā . kiṃkāraṇā ādānataṇhā vuccati rūpataṇhā . Tāya rūpaṃ ādiyanti upādiyanti gaṇhanti parāmasanti abhinivisanti vedanaṃ saññaṃ saṅkhāre viññāṇaṃ gatiṃ upapattiṃ paṭisandhiṃ bhavaṃ saṃsāraṃ vaṭṭaṃ ādiyanti upādiyanti gaṇhanti parāmasanti abhinivisanti taṃkāraṇā ādānataṇhā vuccati rūpataṇhā . ādānataṇhaṃ vinayetha sabbanti sabbaṃ ādānataṇhaṃ vinayetha vineyya pajaheyya vinodeyya byantīkareyya anabhāvaṅgameyyāti ādānataṇhaṃ vinayetha sabbaṃ . bhadrāvudhāti bhagavāti bhadrāvudhāti bhagavā taṃ brāhmaṇaṃ nāmena ālapati . bhagavāti gāravādhivacanametaṃ .pe. sacchikā paññatti yadidaṃ bhagavāti bhadrāvudhāti bhagavā.

[425] Uddhaṃ adho tiriyaṃ vāpi majjheti uddhanti vuccati anāgataṃ . adhoti atītaṃ . tiriyaṃ vāpi majjheti paccuppannaṃ . Uddhanti kusalā dhammā . adhoti akusalā dhammā . tiriyaṃ vāpi majjheti abyākatā dhammā . uddhanti devaloko . adhoti Apāyaloko . tiriyaṃ vāpi majjheti manussaloko . uddhanti sukhā vedanā . adhoti dukkhā vedanā . tiriyaṃ vāpi majjheti adukkhamasukhā vedanā . uddhanti arūpadhātu . adhoti kāmadhātu . Tiriyaṃ vāpi majjheti rūpadhātu . uddhanti uddhaṃ pādatalā . Adhoti adho kesamatthakā . tiriyaṃ vāpi majjheti vemajjheti uddhaṃ adho tiriyaṃ vāpi majjhe.

[426] Yaṃ yaṃ hi lokasmiṃ upādiyantīti yaṃ yaṃ hi rūpagataṃ vedanāgataṃ saññāgataṃ saṅkhāragataṃ viññāṇagataṃ ādiyanti upādiyanti gaṇhanti parāmasanti abhinivisanti . lokasminti apāyaloke .pe. Āyatanaloketi yaṃ yaṃ hi lokasmiṃ upādiyanti.

[427] Teneva māro anveti jantunti teneva kammābhisaṅkhāravasena paṭisandhiko khandhamāro dhātumāro āyatanamāro gatimāro upapattimāro paṭisandhimāro bhavamāro saṃsāramāro vaṭṭamāro anveti anugacchati anvāyiko hoti . jantunti sattaṃ naraṃ mānavaṃ posaṃ puggalaṃ jīvaṃ jātuṃ jantuṃ indaguṃ manujanti teneva māro anveti jantuṃ . Tenāha bhagavā ādānataṇhaṃ vinayetha sabbaṃ (bhadrāvudhāti bhagavā) uddhaṃ adho tiriyaṃ vāpi majjhe yaṃ yaṃ hi lokasmiṃ upādiyanti teneva māro anveti jantunti.