[428] Tasmā pajānaṃ na upādiyetha bhikkhu sato kiñcanaṃ sabbaloke ādānasatte iti pekkhamāno pajaṃ imaṃ maccudheyye visattaṃ.

[429] Tasmā pajānaṃ na upādiyethāti tasmā taṃkāraṇā taṃhetu tappaccayā taṃnidānā etaṃ ādīnavaṃ sampassamāno ādānataṇhāyāti tasmā . pajānanti jānanto pajānanto ājānanto vijānanto paṭivijānanto paṭivijjhanto sabbe saṅkhārā aniccāti .pe. yaṅkiñci samudayadhammaṃ sabbantaṃ nirodhadhammanti jānanto pajānanto ājānanto vijānanto paṭivijānanto paṭivijjhanto . na upādiyethāti rūpaṃ nādiyeyya na upādiyeyya na gaṇheyya na parāmaseyya nābhiniviseyya vedanaṃ saññaṃ saṅkhāre viññāṇaṃ gatiṃ upapattiṃ paṭisandhiṃ bhavaṃ saṃsāraṃ vaṭṭaṃ nādiyeyya na upādiyeyya na gaṇheyya na parāmaseyya nābhiniviseyyāti tasmā pajānaṃ na upādiyetha.

[430] Bhikkhu sato kiñcanaṃ sabbaloketi bhikkhūti kalyāṇaputhujjano vā bhikkhu sekkho vā bhikkhūti bhikkhu. Satoti catūhi kāraṇehi sato kāye kāyānupassanāsatipaṭṭhānaṃ bhāvento sato .pe. so vuccati satoti bhikkhu sato . kiñcananti kiñci rūpagataṃ vedanāgataṃ saññāgataṃ saṅkhāragataṃ viññāṇagataṃ. Sabbaloketi sabbaapāyaloke sabbadevaloke sabbamanussaloke sabbakhandhaloke sabbaāyatanaloke sabbadhātuloketi bhikkhu sato kiñcanaṃ sabbaloke.

[431] Ādānasatte iti pekkhamānoti ādānasattā vuccanti ye rūpaṃ ādiyanti upādiyanti gaṇhanti parāmasanti abhinivisanti vedanaṃ saññaṃ saṅkhāre viññāṇaṃ gatiṃ upapattiṃ paṭisandhiṃ bhavaṃ saṃsāraṃ vaṭṭaṃ ādiyanti upādiyanti gaṇhanti parāmasanti abhinivisanti . Itīti padasandhi .pe. padānupubbakametaṃ itīti . pekkhamānoti dakkhamāno dissamāno passamāno olokayamāno nijjhāyamāno upaparikkhamānoti ādānasatte iti pekkhamāno.