[453] Kissassa vippahānena nibbānaṃ iti vuccatīti kissassa vippahānena vūpasamena paṭinissaggena paṭippassaddhiyā nibbānaṃ iti vuccati pavuccati kathiyati bhaṇiyati dīpiyati vohariyatīti kissassa vippahānena nibbānaṃ iti vuccati. Tenāha so brāhmaṇo kiṃsusaññojano loko kiṃsu tassa vicāraṇaṃ kissassa vippahānena nibbānaṃ iti vuccatīti.

[454] Nandisaññojano loko vitakkassa vicāraṇā taṇhāya vippahānena nibbānaṃ iti vuccati.

[455] Nandisaññojano lokoti nandi vuccati taṇhā yo rāgo sārāgo .pe. abhijjhā lobho akusalamūlaṃ . yā nandi lokassa saññojanaṃ lagganaṃ bandhanaṃ upakkileso imāya nandiyā loko yutto payutto āyutto samāyutto laggo laggito palibuddhoti nandisaññojano loko.

[456] Vitakkassa vicāraṇāti vitakkāti nava vitakkā kāmavitakko byāpādavitakko vihiṃsāvitakko ñātivitakko Janapadavitakko amaravitakko parānuddayatāpaṭisaṃyutto vitakko lābhasakkārasilokapaṭisaṃyutto vitakko anavaññattipaṭisaṃyutto vitakko ime vuccanti nava vitakkā . ime nava vitakkā assa lokassa cāraṇā vicāraṇā paṭivicāraṇā imehi navahi vitakkehi so loko carati vicarati paṭivicaratīti vitakkassa vicāraṇā.