[469] Anejo chinnasaṃsayoti ejā vuccati taṇhā yo rāgo sārāgo .pe. abhijjhā lobho akusalamūlaṃ . sā ejā taṇhā buddhassa bhagavato pahīnā ucchinnamūlā tālāvatthukatā anabhāvaṅgatā āyatiṃ anuppādadhammā tasmā buddho anejo . Ejāya pahīnattā anejo . bhagavā lābhepi na iñjati alābhepi na iñjati yasepi na iñjati ayasepi na iñjati pasaṃsāyapi na Iñjati nindāyapi na iñjati sukhepi na iñjati dukkhepi na iñjati na calati na vedhati na pavedhati na sampavedhatīti anejo. Chinnasaṃsayoti saṃsayo vuccati vicikicchā dukkhe kaṅkhā .pe. chambhitattaṃ cittassa manovilekho . so saṃsayo buddhassa bhagavato [1]- chinno ucchinno samucchinno vūpasanto [2]- paṭippassaddho abhabbuppattiko ñāṇagginā daḍḍho tasmā buddho chinnasaṃsayoti anejo chinnasaṃsayo.

[470] Pāragū sabbadhammānanti bhagavā sabbadhammānaṃ abhiññāpāragū pariññāpāragū pahānapāragū bhāvanāpāragū sacchikiriyāpāragū samāpattipāragū abhiññāpāragū sabbadhammānaṃ .pe. jātijarāmaraṇasaṃsāro natthī tassa punabbhavoti pāragū sabbadhammānaṃ.

[471] Atthī pañhena āgamanti pañhatthikamhā āgatā .pe. sandassetuṃ bhaṇitunti evampi atthī pañhena āgamaṃ . Tenāha so brāhmaṇo yo atītaṃ ādisati (iccāyasmā posālo) anejo chinnasaṃsayo pāragū sabbadhammānaṃ atthī pañhena āgamanti.

[472] Vibhūtarūpasaññissa sabbakāyappahāyino ajjhattañca bahiddhā ca natthi kiñcīti passato Ñāṇaṃ sakkānupucchāmi kathaṃ neyyo tathāvidho.