[485] Nandisaññojanaṃ itīti nandisaññojanaṃ vuccati arūparāgo . Arūparāgena taṃ kammaṃ laggaṃ laggitaṃ palibuddhaṃ arūparāgaṃ nandisaññojananti ñatvā laggananti ñatvā bandhananti ñatvā palibodhoti ñatvā jānitvā tulayitvā tīrayitvā vibhāvayitvā Vibhūtaṃ katvā . itīti padasandhi .pe. padānupubbakametaṃ itīti nandisaññojanaṃ iti.

[486] Evametaṃ abhiññāyāti evaṃ etaṃ abhiññāya jānitvā tulayitvā tīrayitvā vibhāvayitvā vibhūtaṃ katvāti evametaṃ abhiññāya.

[487] Tato tattha vipassatīti ākiñcaññāyatanaṃ samāpajjitvā tato vuṭṭhahitvā tattha jāte cittacetasike dhamme aniccato vipassati dukkhato vipassati rogato .pe. anissaraṇato vipassati dakkhati oloketi nijjhāyati upaparikkhatīti tato tattha vipassati.

[488] Etaṃ ñāṇaṃ tathaṃ tassāti etaṃ ñāṇaṃ tacchaṃ bhūtaṃ yāthāvaṃ aviparītaṃ tassāti etaṃ ñāṇaṃ tathaṃ tassa.