[489] Brāhmaṇassa vusīmatoti brāhmaṇassāti sattannaṃ dhammānaṃ bāhitattā brāhmaṇo .pe. anissito tādi pavuccate sa brahmāti brāhmaṇassa . vusīmatoti kalyāṇaputhujjane upādāya satta sekkhā appattassa pattiyā anadhigatassa adhigamāya asacchikatassa sacchikiriyāya vasanti saṃvasanti āvasanti parivasanti . Arahā vusitavā katakaraṇīyo ohitabhāro anuppattasadattho parikkhīṇabhavasaññojano sammadaññā vimutto so vuṭṭhavāso ciṇṇacaraṇo .pe. jātijarāmaraṇasaṃsāro natthi tassa punabbhavoti Brāhmaṇassa vusīmato. Tenāha bhagavā ākiñcaññāsambhavaṃ ñatvā nandisaññojanaṃ iti evametaṃ abhiññāya tato tattha vipassati etaṃ ñāṇaṃ tathaṃ tassa brāhmaṇassa vusīmatoti. Saha gāthāpariyosānā .pe. satthā me bhante bhagavā sāvakohamasmīti. Posālamāṇavakapañhāniddeso cuddasamo. -------------