[493] Yāvatatiyañca devisi byākarotīti me sutanti yāvatatiyaṃ buddho sahadhammikaṃ pañhaṃ puṭṭho byākaroti no sampāyatīti Evaṃ mayā uggahitaṃ evaṃ mayā upadhāritaṃ evaṃ mayā upalakkhitaṃ . Devisīti bhagavā devo ceva isi cāti devisi. Yathā rājapabbajitā vuccanti rājisayo brāhmaṇapabbajitā vuccanti brāhmaṇisayo evameva bhagavā devo ceva isi cāti devisi . Athavā bhagavā pabbajitotipi isi . mahantaṃ sīlakkhandhaṃ esi gavesi pariyesītipi isi . mahantaṃ samādhikkhandhaṃ mahantaṃ paññākkhandhaṃ mahantaṃ vimuttikkhandhaṃ mahantaṃ vimuttiñāṇadassanakkhandhaṃ esi gavesi pariyesītipi isi. {493.1} Mahato tamokāyassa padālanaṃ mahato vippallāsassa pabhedanaṃ mahato taṇhāsallassa abbuḷhanaṃ mahato diṭṭhisaṅghātassa vinibbeṭhanaṃ mahato mānaddhajassa pātanaṃ mahato abhisaṅkhārassa vūpasamaṃ mahato oghassa nittharaṇaṃ mahato bhārassa nikkhepanaṃ mahato saṃsāravaṭṭassa upacchedaṃ mahato santāpassa nibbāpanaṃ mahato pariḷāhassa paṭippassaddhiṃ mahato dhammaddhajassa ussāpanaṃ esi gavesi pariyesītipi isi . mahante satipaṭṭhāne mahante sammappadhāne mahante iddhipāde mahantāni indriyāni mahantāni balāni mahante bojjhaṅge mahantaṃ ariyaṃ aṭṭhaṅgikaṃ maggaṃ mahantaṃ nibbānaṃ esi gavesi pariyesītipi isi. {493.2} Mahesakkhehi vā sattehi esito gavesito pariyesito kahaṃ buddho kahaṃ bhagavā kahaṃ devadevo kahaṃ narāsabhotipi isīti yāvatatiyañca devisi byākarotīti me sutaṃ. Tenāha so brāhmaṇo Dvāhaṃ sakka apucchissaṃ (iccāyasmā mogharājā) na me byākāsi cakkhumā yāvatatiyañca devisi byākarotīti me sutanti.

[494] Ayaṃ loko paro loko brahmaloko sadevako diṭṭhinte nābhijānāti gotamassa yasassino.

[495] Ayaṃ loko paro lokoti ayaṃ lokoti manussaloko. Paro lokoti manussalokaṃ ṭhapetvā sabbo paro lokoti ayaṃ loko paro loko.