[496] Brahmaloko sadevakoti brahmaloko sadevako samārako sassamaṇabrāhmaṇī pajā sadevamanussāti brahmaloko sadevako.

[497] Diṭṭhinte nābhijānātīti tuyhaṃ diṭṭhiṃ khantiṃ ruciṃ laddhiṃ ajjhāsayaṃ adhippāyaṃ loko na jānāti ayaṃ evaṃdiṭṭhiko evaṃkhantiko evaṃruciko evaṃladdhiko evaṃajjhāsayo evaṃadhippāyoti na jānāti na passati na dakkhati nādhigacchati na vindati na paṭilabhatīti diṭṭhinte nābhijānāti.

[498] Gotamassa yasassinoti bhagavā yasappattoti yasassī . Athavā bhagavā sakkato garukato mānito pūjito apacito lābhī cīvarapiṇḍapātasenāsanagilānapaccayabhesajjaparikkhārānanti gotamassa yasassino. Tenāha so brāhmaṇo Ayaṃ loko paro loko brahmaloko sadevako diṭṭhinte nābhijānāti gotamassa yasassinoti.

[499] Evaṃ abhikkantadassāviṃ atthī pañhena āgamaṃ kathaṃ lokaṃ avekkhantaṃ maccurājā na passati.