[532] Idamavoca bhagavā magadhesu viharanto pāsāṇake cetiye paricārikasoḷasannaṃ brāhmaṇānaṃ ajjhiṭṭho puṭṭho puṭṭho pañhaṃ byākāsi.

[533] Idamavoca bhagavāti imaṃ pārāyanaṃ avoca. Bhagavāti gāravādhivacanametaṃ .pe. sacchikā paññatti yadidaṃ bhagavāti idamavoca bhagavā.

[534] Magadhesu viharantoti magadhanāmake janapade . viharantoti viharanto iriyanto vattento pālento yapento yāpento . Pāsāṇake cetiyeti pāsāṇakacetiyaṃ vuccati buddhāsananti magadhesu viharanto pāsāṇake cetiye.

[535] Paricārikasoḷasannaṃ brāhmaṇānanti piṅgiyo brāhmaṇo bāvarissa brāhmaṇassa seṭṭho seṭṭhavaro paricāriko piṅgiyena te soḷasāti evampi paricārikasoḷasannaṃ brāhmaṇānaṃ . athavā te soḷasa brāhmaṇā buddhassa bhagavato seṭṭhā seṭṭhavarā paricārikā siyunti evampi paricārikasoḷasannaṃ brāhmaṇānaṃ.