[536] Ajjhiṭṭho puṭṭho puṭṭho pañhaṃ byākāsīti ajjhiṭṭho ajjhesito . puṭṭho puṭṭhoti puṭṭho pucchito yācito Ajjhesito pasādito . pañhaṃ byākāsīti pañhaṃ byākāsi ācikkhi desesi paññapesi paṭṭhapesi vivari vibhaji uttānīmakāsi pakāsesīti ajjhiṭṭho puṭṭho puṭṭho pañhaṃ byākāsi.

[537] Ekamekassa cepi pañhassa atthamaññāya dhammamaññāya dhammānudhammaṃ paṭipajjeyya gaccheyyeva jarāmaraṇassa pāraṃ pāragamanīyā ime dhammāti tasmā imassa dhammapariyāyassa pārāyanantveva adhivacanaṃ.

[538] Ekamekassa cepi pañhassāti ekamekassa cepi ajitapañhassa ekamekassa cepi tissametteyyapañhassa ekamekassa cepi puṇṇakapañhassa ekamekassa cepi mettagūpañhassa ekamekassa cepi dhotakapañhassa ekamekassa cepi upasīvapañhassa ekamekassa cepi nandapañhassa ekamekassa cepi hemakapañhassa ekamekassa cepi todeyyapañhassa ekamekassa cepi kappapañhassa ekamekassa cepi jatukaṇṇīpañhassa ekamekassa cepi bhadrāvudhapañhassa ekamekassa cepi udayapañhassa ekamekassa cepi posālapañhassa ekamekassa cepi mogharājapañhassa ekamekassa cepi piṅgiyapañhassāti ekamekassa cepi pañhassa.

[539] Atthamaññāya dhammamaññāyāti sveva pañho dhammo visajjanaṃ atthoti atthaṃ aññāya jānitvā tulayitvā Tīrayitvā vibhāvayitvā vibhūtaṃ katvāti atthamaññāya . Dhammamaññāyāti dhammaṃ aññāya jānitvā tulayitvā tīrayitvā vibhāvayitvā vibhūtaṃ katvāti dhammamaññāya.